एजेन्सी । अर्जेन्टिनी स्टार खेलाडी लियोनल मेसीले नयाँ घर किनेका छन् । मेजर लिग सकर (एमएलएस) क्लब इन्टर मियामीमा हालै आबद्ध भएका मेसीले महँगो मूल्यमा नयाँ घर खरिद गरेका हुन् ।
इन्टर मियामीमा आबद्ध भएयता मेसी आफ्नो परिवारसहित अमेरिकामै बस्दै आएका छन् । मेसी र उनकी श्रीमती एन्टोनेला रोकुज्जो दुबैको रोजाइमा नयाँ घर किनिएको समाचारमा जनाइएको छ । मेसीको नयाँ घर १० हजार पाँच सय स्क्वायर फिटमा फैलिएको छ ।
३६ वर्षीय मेसीले फ्लोरिडाको लाउडरडेलमा किनेको नयाँ घरमा आठवटा बेडरुम रहेको छ । उनको घरको बार्दलीबाट समुद्रको मनोरम दृश्य देख्न सकिनेछ । उनको नयाँ घरमा स्विमिङ पुल, इटालियन शैलीको किचन र तीनवटा गाडी अटाउने ग्यारेजको सुविधा रहेको छ ।
यसैगरी उनको घरमा स्पा र जिमको सुविधा पनि रहेको छ । मेसीले उक्त घर १०.८ मिलियन डलरमा (एक अर्ब ४२ करोड ७१ लाख नेपाली रुपैयाँ) खरिद गरेको न्यूयोर्क पोस्टले जनाएको छ । मेसी गत जुलाईमा इन्टर मियामीमा आबद्ध भएका थिए ।
