काठमाडौं: पूर्वराष्ट्रपति विद्यादेवी भण्डारीले मृदुभाषी, शालीन व्यक्तित्वका धनी, समन्वयकारी गुण भएका नेकपा (एमाले)का उपाध्यक्ष सुवासचन्द्र नेम्वाङको अप्रत्याशित र अकल्पनीय निधनको खबरले स्तब्ध भएको बताउनु भएको छ ।
उहाँले सामाजिक सञ्जालमा लेख्नु भएको छ, “म उहाँप्रति भावपूर्ण श्रद्धाञ्जली अर्पण गर्दछु । यस दु:खद् घडीमा शोकाकुल परिवारजन र पार्टी परिवारमा गहिरो समवेदना व्यक्त गर्दछु । उहाँको निधनले सिङ्गो पार्टी र राष्ट्रलाई अपूरणीय क्षति पुगेको छ । ”
नेम्बाङको मंगलबार राति बालुवाटारस्थित निजी निवासमा हृदयाघात भएको थियो । लगत्तै त्रिवि शिक्षण अस्पताल लगिए पनि चिकित्सकहरुले श्री नेम्बाङको निधन भएको घोषणा गरेका थिए ।
