एजेन्सी । एसिया कपको सुपर–४ चरणमा आइतबार भारत र पाकिस्तानबीचको खेल वर्षा र भिजेको मैदानका कारण पूरा हुन सकेन ।
अब खेल आज (रिजर्भ डे) कोलम्बोको आर प्रेमदासा स्टेडियममा दिउँसो सवा ३ बजेदेखि हुनेछ ।
खेल रोकिएको अवस्थाबाटै फेरि सुरु हुनेछ । खेल रोकिँदासम्म भारतले २४.१ ओभरमा दुई विकेट गुमाएर १४७ रन बनाएको थियो । यहीँबाट खेल सुचारु हुनेछ ।
भारतीय इनिङ्समा रोहित शर्मा र शुभमन गिलको ब्याटिङले दर्शकलाई रोमाञ्चित बनाएको थियो । यी इनिङ्सले धेरै कीर्तिमान तोडे ।
श्रीलंकामा रोहितको ३३ छक्का प्रहार
भारतीय कप्तान रोहित शर्मा श्रीलंकाको भूमिमा सबैभन्दा बढी छक्का प्रहार गर्ने विदेशी ब्याट्सम्यान बनेका छन् । उनले पाकिस्तानविरुद्धको अर्धशतकीय पारीमा ४ छक्का प्रहार गरेका थिए ।
यस खेलमा रोहितले ४९ बलमा ११४.२९ को स्ट्राइक रेटमा ५६ रन बनाएका थिए । तीनवटै ढाँचामा रोहितले श्रीलंकामा ३३ छक्का प्रहार गरेका छन् ।
रोहितले श्रीलंकामा ३०–३० छक्का प्रहार गर्ने क्रिस गेल र शेन वाट्सनको कीर्तिमान तोडेका हुन् ।
साथै, रोहितले आफ्नो एकदिवसीय करियरको ५० औं अर्धशतक बनाए । एसिया कपमा रोहितको यो ९ औं अर्धशतक हो । उनले एसिया कपमा सबैभन्दा बढी अर्धशतक प्रहार गर्ने भारतीय ब्याट्सम्यान सचिन तेन्दुलकरको कीर्तिमानी बराबरी गरेका छन् । अहिले दुबैको नाममा ९–९ अर्धशतक छ । उनले अब अर्को अर्धशतक बनाउने बित्तिकै सचिनको कीर्तिमान तोड्नेछन् ।
