पालिकेलीः श्रीलंकाली बलर प्रवीन जयविक्रमाले ११ विकेट लिएसँगै श्रीलंकाले बंगलादेशलाई दोस्रो तथा अन्तिम टेस्टमा २०९ रनले पराजित गरेको छ । स्पिनर प्रवीनको श्रीलंकाका लागि यो पहिलो टेस्ट खेल हो ।  

श्रीलंकालाई पाँचौं दिन जितका लागि पाँच विकेट चाहिएको थियो जसमा प्रवीन एक्लैले तीन विकेट लिएका थिए । उनले दुबै इनिङमा १७८ रन खर्चेर ११ विकेट लिए । उनी प्लेयर अफ द म्याच पनि घोषित भए ।

श्रीलंकाका लागि यसअघि तीन वर्षअघि अकिला धनन्जयले पहिलो खेलमा बंगलादेश विरुद्ध ८ विकेट लिएको रेकर्ड बनाएका थिए ।

बंगलादेशले अन्तिम तीन विकेट ८ बलको अन्तरालमा गुमाएको थियो ।

अफ स्पिनर रमेश मेन्डिसले पनि चार विकेट लिए । पिचमा संघर्ष गर्नु परेको बंगलादेशका लागि मुस्फिकर रहिमले ४० रनको योगदान गरेका थिए ।

श्रीलंकाले पहिलो इनिङमा ७ विकेटका क्षतिमा ४९३ रन बनाएर पाली समाप्तिको घोषणा गरेको थियो । पहिलो इनिङमा श्रीलंकाका लागि दिमुथ करुणारत्नेले ११८ र लाहिरु थिरिमानेले १४० रनको व्यक्तिगत योगदान दिएका थिए ।

जवाफमा बंगलादेशको टिम पहिलो इनिङमा २५१ रनमै समेटिएको थियो । तमिम इक्वालले ९२ र कप्तान मोमिनुल हकले ४९ रन बनाउनु बाहेक अरु ब्याट्सम्यानले खासै योगदान दिएका थिएनन् ।

बंगलादेशको टिम फलो अनमा परे पनि श्रीलंकाले दोस्रो इनिङको ब्याटिङ रोजेको थियो । श्रीलंकाले दोस्रो इनिङमा ९ विकेटको क्षतिमा १९४ रन बनाएर पाली समाप्तीको घोषणा गरेको थियो ।

जितका लागि ४३७ रनको विशाल लक्ष्य पछ्याएको बंगलादेश दोस्रो इनिङमा २२७ रनमै समेटिएको थियो ।

यी दुई बीचको पहिलो टेस्ट बराबरीमा सकिएको थियो । एपी

Sri Lanka vs Bangladesh Cricket