काठमाडौँ । चलचित्र ‘एक भगवत् गीता’लाई चलचित्र विकास बोर्डले सेन्सर अनुमति नदिएपछि विवाद बढ्दो छ । धार्मिक संगठनहरूले फिल्मको नाम फेर्न दबाब दिएपछि विकास बोर्डले सेन्सर अनुमति दिन रोक लगायो ।
यसैबीच फिल्मकी निर्देशक झरना थापाले मध्यरातमा फसबुकमा एक पोस्ट गरेकी छन् । पोस्टमा उनले आफू फिल्ममा अनावश्यक हस्तक्षेपले निम्त्याएको अवस्थाले आफू निदाउन नसकिएको उल्लेख गरेकी छन् ।
स्वयम् श्रीकृष्णको भक्त भएकाले चलचित्रले धार्मिक संहिष्णुतामा खलल नगरेको उनले प्रष्ट पारेकी छन् ।
‘मैले मेरो जीवनको तीन दशक अनवरत रुपमा चलचित्र क्षेत्रमा दिएँ, प्रिय दर्शक हजुरहरुको मायाले म पर्दामा छाइरहेँ, मैले पनि दिनरात , झरीबादल , घर परिवार नभनी हजुरहरुलाई मनोरञ्जन दिन अथक काम गरिरहेँ, सम्पूर्ण नेपाली दर्शकहरुको माया र साथको कारणले म अभिनय हुँदै निर्देशनमा आइपुगेको छु, म जहाँ छु , जे छु , जस्तो छु , म नेपाली जन र नेपाली मनको आशिर्वादले छु , यहि प्रेरणाले म मेरो अन्तिम साससम्म चलचित्रमै काम गर्छु भनेर हिँडीरहेकी छु , मेरो जिन्दगी भनेकै चलचित्र कर्म र दर्शक हरुको खुसि हो , त्यसबाहेक केहि छैन ।’ उनले भनेकी छन् ।
आफ्नो जीवन नै भगवान श्रीकृष्णको आस्थामा चलेको र श्रीमद्भागवत गीता आफैँमा चलचित्र कर्मको प्रेरणा रहेको बताउँदै धार्मिक आस्था र सहिष्णुतामा आफू सचेत रहेको उनले प्रस्ट्याएकी छन् । साथै, आफूले कथा चयन गर्दा सबै कुराको अध्ययन गरेको समेत बताएकी छन् ।
