काठमाडौं । राष्ट्रिय प्रजातन्त्र पार्टी (राप्रपा)का अध्यक्ष राजेन्द्र लिङ्देनले पूर्वअध्यक्ष कमल थापाले पार्टी परित्याग गर्नु अनपेक्षित रहेको बताउनुभएको छ ।
पूर्व–उपप्रधानमन्त्रीसमेत रहनुभएका थापाले मंगलबार एक विज्ञप्ति जारी गर्दै आफू पार्टीबाट अलग भएको घोषणा गर्नुभएको थियो ।
यसबारे कुरा गर्दै अध्यक्ष लिङ्देनले कमल थापाले पठाउनुभएको पत्रको विषयमा पार्टीको शीर्ष तहमा छलफल भएको बताउँदै सल्लाह सुझावमा समाधानको उपाय खोज्ने अन्तिम प्रयास भइरहेका बेला यस प्रकारको निर्णय हुनु अनपेक्षित र थापाको राजनीतिक जीवनको लागि दुर्भाग्यपूर्ण घटना रहेको बताउनुभएको हो ।
गत मंसिरमा पार्टी महाधिवेशनमा लिङ्देनसँग अध्यक्षमा पराजित भएपछि थापाले पार्टीमा पूर्व राजाको हस्तक्षेप भएको भन्दै छानबिन गर्न माग गर्दै तीन पटक अध्यक्ष लिङ्देनलाई ध्यानाकर्षण गराउनुभएको थियो ।
यो पनिः लिङ्देनलाई कमल थापाको पत्र– मलाई भित्तामा पुर्याउने र पार्टीलाई दुर्घटनातर्फ धकेल्ने काम नहोस्
