काठमाडौं । नेकपा एमालेको एकता जोगाउन पार्टीका दोस्रो तहका नेताहरुको सक्रियता बढेको छ । प्रधानमन्त्री तथा पार्टी अध्यक्ष केपी शर्मा ओलीको प्रस्ताव अनुसार नै दुवै पक्षका नेताहरुबीच सहमतिको प्रयास भइरहेको स्रोतले जनाएको छ ।
प्रधानमन्त्री निवास बालुवाटारमा छलफलका लागि अध्यक्ष ओलीको तर्फबाट अर्थमन्त्री विष्णु पौडेल, संसदीय दलका उपनेता सुवास नेम्वाङ, प्रधानमन्त्रीका मुख्य सल्लाहकार विष्णु रिमाल र माधव नेपाल पक्षका नेताहरू गोकर्ण विष्ट, सुरेन्द्र पाण्डे, घनश्याम भुसाल, र योगेश भट्टराई छलफलमा जुटेका छन् । केही दिनयता अध्यक्ष ओली, महासचिव ईश्वर पोखरेल, अर्थमन्त्री विष्णु पौडेल माधव पक्षका यी चार नेतासँग निरन्तर छलफल गरिरहेका छन् ।
नेताहरुबिच वालुवाटारमा छलफल जारि रहेपनि बुँदागत रुपमा टुंगो लागिनसकेको वार्तामा सहभागी एक नेताले बालुवाटारबाट बताए । पार्टीलाई कुनै न कुनै रुपमा जेठ २, २०७५ को अवस्थामा फर्काएर त्यसपछि नयाँ ढंगले अघि बढाउन माधव पक्ष नेताहरुले जोड दिएका छन् ।
यसैबीच एमालेका शीर्ष नेताहरुसँग छलफल जारी राखेका बेला पोखरेल शीतल निवास पुगेका छन् । नेताहरुबीच एकताको प्रयास भइरहेका बेला उपप्रधानमन्त्री तथा एमाले महासचिव ईश्वर पोखरेल राष्ट्रपति भेट्न शीतल निवास पुगेका हुन् ।
