काठमाडौं । नेपाल पर्यटन वोर्ड र नेपाल एसोसिएसन अफ र्याफ्टिङ एजेन्सिज (नारा) को संयोजनमा बागमती नदीमा जलयात्रा गरिएको छ ।
पर्यटन सम्बद्ध विभिन्न संघसंस्थाहरुले शनिबार कुपोन्डोलस्थित बागमती नदीबाट सुन्दरीघाट सम्म जलयात्रा गरिएको हाे।
वागमती नदीको अवस्था र त्यसको व्यवस्थापनबारे समग्रतामा जानकारी दिने उद्देश्यसहित सो जलजात्राको २३ औं संस्करण मनाईएको नाराका अध्यक्ष शिव अधिकारीले जानकारी दिनुभयो ।
अध्यक्ष अधिकारीले भन्नुभयो, ‘यस महोत्सवको उद्देश्य वागमती नदीलाई माया गर्ने, विभिन्न व्यक्तित्व, संघसंस्थाहरु र आम नागरिकलाई यस महाअभियानमा सरिक गराउने सत्प्रयास हो । यो महोत्सव एक साझा मञ्च हो । जसमा सबैलाई नदी नजिक पुर्याउने, नदीको अवस्था बुझाउने, नदी चिनाउने तथा तिनीहरुको सरोकार राख्ने अवस्था सृजना गर्दछ । यो महोत्सवको निरन्तरताको रुपमा स्थानीय सहभागिताद्वारा वागमती नदी किनारमा पार्क तथा खेलकुद मैदान समेत निर्माण गर्नेगरी अगाडि बढन पहलकदमी लिने प्रतिवद्धता समेत जाहेर गर्दछौं ।’
सो जलजात्रामा सरकारी निकाय, सञ्चारकर्मी, विद्यार्थी, स्थानीय, वागमती सफाई अभियानमा संलग्नहरु सहभागी थिए । वागमती नदी किनारामा पार्क तथा खेलकुद मैदान समेत निर्माण हुने गरी आफूहरुले सो जलजात्रा अभियानलाई निरन्तरता दिँदै आएको पनि नाराले जनाएको छ ।
तस्बिर : हरिराम भेटुवाल / रासस
