काठमाडौँ । एसिया कप खेल्ने नेपाली क्रिकेट टोलीलाई राष्ट्रपति रामचन्द्र पौडेलले शुभकामना दिनुभएको छ ।
मंगलबार दिउँसो शीतल निवासमा राष्ट्रपति पौडेलले एसिया कप खेल्न भोलि पाकिस्तान प्रस्थान गर्न लागेको टोलीलाई सफलताको शुभकामना दिनुभएको हो ।
यसप्रकारका अन्तराष्ट्रिय प्रतियोगितामा हुने नेपालको सहभागिताले खेलाडीलाई आफ्नो व्यक्तित्व निर्माण गर्ने अवसरसहित नेपाल र नेपालीलाई अन्तराष्ट्रिय जगतमा चिनाउन र राष्ट्रको प्रतिष्ठा एवम् गरिमा बढाउन योगदान दिने राष्ट्रपति पौडेलले बताउनु भयो ।
नेपालमा बढ्दो क्रिकेटप्रतिको आकषर्ण र यस खेलमा पछिल्लो समय हासिल गरेको प्रगतिले हामी सबैलाई उत्साहित बनाएको राष्ट्रपति पौडेलको भनाई छ ।
विश्व क्रिकेटमा भारत र पाकिस्तानजस्ता ठूला क्रिकेट टिमसँग खेल्ने अवसर नेपाली टीमका लागि थप उत्साहको विषय रहेको बताउँदै राष्ट्रपति पौडेलले उत्कृष्ट खेल प्रदर्शन र परिणाम निकाल्न खेलाडीहरुको अहोरात्रको मिहिनेत र परिश्रम सफल होस् भन्ने कामना गर्नुभएको छ ।
नेपाली राष्ट्रिय क्रिकेट टोलीले आज नै पशुपतिनाथ पुगेर दर्शन पनि गरेका थिए । एसिया कप भदौ १३ गतेदेखि सुरु हुँदैछ । नेपालले उद्घाटन खेलमा पाकिस्तानसँग प्रतिस्पर्धा गर्नेछ ।
