पोखरा । मनसुनका कारण रोकिएको पोखराको हट एयर बलुन आगामी सेप्टेम्बरदेखि पुन: सञ्चालनमा आउने भएको छ ।
मौसममा सुधार भएसँगै करिब तीन महिना रोकिएको हट एयर बलुन सेप्टेम्बर १ देखि सुरु गर्न लागिएको हो ।
पोखराको साहसिक पर्यटनलाई ध्यानमा राख्दै पुन: सुचारु गर्न लागेको बेलुन नेपालका अध्यक्ष विक्रम बादेले जानकारी दिए । पछिल्लो समय साहसिक पर्यटनका पारखीहरूको रोजाइमा यो खेल परेको छ ।
करिब ६ हजार फिट माथिसम्म उड्ने हट एयर बेलुनबाट माछापुच्छ्रे, अन्नपूर्ण लगायतका हिमालहरू, पूर्ण आकारको फेवाताल, पुम्दिकोट महादेव, सराङ्कोट मान्द्रेढुङ्गाबाट उड्ने प्याराग्लाइडिङ तथा पोखरा उपत्यका आसपासको सुन्दर दृश्यावलोकन गर्न सकिन्छ ।
विगतमा एक मात्रै बेलुन उडाइरहेको बेलुन नेपालले अब २ वटा उडाउने अध्यक्ष बादेले जनाए । बिहान र बेलुका गरी दुई सिफ्टमा उडाइने बलुन अमेरिकी र भियतनामी गरी दुई जना पाइलटले उडाउनेछन् ।
हट एयर बलुनमा उड्नका लागि नेपाली पर्यटकलाई ९ हजार ५ सय रुपैयाँ शुल्क तोकिएको छ भने सार्क मुलुकका लागि १०० डलर र अन्य मुलुककालाई १३० डलर शुल्क कायम छ । यस्तै कम्पनीले नेपाली पर्यटकले रिजर्भ गरी प्राइभेट उडान गर्न चाहेमा आधा घण्टाको ५५ हजार र एक घण्टाको ८० हजार रुपैयाँ तोकेको छ ।
