एजेन्सी । बैंक अफ बडोदाले बलिउड अभिनेता तथा बीजेपी सांसद सनी देओलको जुहू बंगलाको लिलामीको सूचना २४ घण्टाभित्र फिर्ता लिएको छ ।
बैंकले सोमबार पत्रपत्रिकामा खण्डन गर्दै प्राविधिक कारणले यो सूचना फिर्ता लिइएको जनाएको छ । साथै, सनी देओलको सम्पत्ति लिलामी नहुने पनि जनाइएको छ ।
यसअघि आइतबार प्रकाशित सूचना अनुसार सनीले ५६ करोड रुपैयाँ ऋण लिएका थिए, जुन उनले तिर्न सकेनन् । ऋण नतिरेपछि बंगलाको लिलामीको मिति पनि २५ सेप्टेम्बरमा दिइएको थियो ।
बैंकले सनीबाट ऋण असुलीको सूचना समेत प्रकाशित गरेको थियो । यसमा सनीको जमानतमा बुबा धर्मेन्द्रको नाम पनि लेखिएको थियो ।
बलिउड अभिनेता तथा पञ्जाबको गुरदासपुरका बीजेपी सांसद सनी देओल फिल्म गदर–२ लाई लिएर अहिले चर्चामा छन् । कमाईका मामलामा फिल्मले चार सय करोडको आंकडा नजिक पुगेको छ । यसैबीच बैंकले उनलाई ५६ करोड रुपैयाँ ऋण नतिरेको भन्दै नोटिस जारी गरेको थियो ।
सनी देओलको वास्तविक नाम अजय सिंह देओल हो । उनी २०१९ देखि पञ्जाबको गुरदासपुर सिटबाट बीजेपी सांसद हुन् । उनले तत्कालीन कांग्रेस नेता सुनिल जाखरलाई पराजित गरेका थिए । अभिनेता विनोद खन्ना लामो समयदेखि यस सिटबाट भाजपा सांसद थिए ।
