एजेन्सी । सनी देवल स्टारर फिल्म ‘गदर २’ ले बक्स अफिसमा राम्रो कमाई गरिरहेको छ । फिल्मले विभिन्न रेकर्डहरु समेत राखेको छ । फिल्मले बुधबार ३२.३७ करोड कमाएको छ । मात्र ६ दिनमा फिल्मको कुल कमाई २६१.३५ करोड पुगेको छ ।
योसँगै गदर–२ शाहरुख खानको ‘पठान’पछि २०२३ को दोस्रो धेरै कमाउने हिन्दी फिल्म बनेको छ । फिल्मले ‘द केरला स्टोरी’को लाइफटाइम कलेक्शनलाई समेत उछिनेको छ । उक्त फिल्म २३८ करोड कलेक्शनका साथ दोस्रो नम्बरमा रहेको थियो ।
गदर २ रिलिज भएको एक साता पनि भइसकेको छैन, यसले यो वर्षका धेरै ठूला चलचित्रलाई पछि पारेको छ ।
अनिल शर्माको निर्देशन रहेको यो फिल्म २००१ को गदरको सिक्वेल हो । फिल्ममा सनी देवलसँगै अमिशा पटेल, उत्कर्ष शर्मा, मनिष वधवा, गौरव चोपरा लगायतको भूमिका रहेको छ ।
यो वर्ष सबैभन्दा बढी कमाई गर्ने हिन्दी फिल्महरु –
पठान – ५४३.०५ करोड
गदर २ – २६१.३५ करोड
द केरला स्टोरी – २३८.९७ करोड
तू झूठी में मक्कार – १४९.०५ करोड
आदिपुरुष – १४१.०८ करोड
रकी–रानी की प्रेम कहानी – १३९.४२ करोड
किसीका भाई किसीकी जान ११०.५३ करोड
