एजेन्सी । घरमा उडुस परेमा मानिसको टाउको दुख्न थाल्छ । उडुस आतंकबाट पीडित भएकाहरुले मात्र यसको झन्झटबारे थाहा पाउन सक्छन् । उडुसको टोकाइबाट रातभर सुत्न पाइँदैन ।
यसबाट कसरी मुक्ति पाउन सकिन्छ भनेर मानिसमा अनेक उपाय खोज्ने इच्छा हुन्छ । उडुसको टोकाइबाट शरीर चिलाउने, सुन्निने तथा एलर्जी हुनुका साथै विभिन्न रोगहरुसमेत लाग्नसक्छ ।
उडुस सानो र छिट्टै लुक्ने परजीवी भएकाले यसलाई निर्मुल पार्न एकदमै कठिन हुन्छ । एउटा माउ उडुसले आफ्नो जीवन कालभर पाँचसय अण्डा पार्छ । यसरी गुणात्मकरुपमा फैलिने जाँदा यसले पूरै घर, छिमेकलाई समेत प्रभावित बनाउँछ । यसको नियन्त्रणमा जति ढिलाइ गर्यो, त्यति नै सास्ती भोग्नुपर्ने भएकाले यसलाई बैलेमा निर्मुल पार्नुपर्छ ।
उडुसले शरीरको कुनै पनि भागमा सजिलैसाग टोक्न सक्छ । यसैबीच आज उडुस भगाउने केही घरेलु विधिहरुबारे चर्चा गरौं ।
पुदिना रसः
उडुसले पुदिनाको गन्ध सहन सक्दैन । त्यसैले, पुदीनाका केही पात आफ्नो ओछ्यानको नजिक राख्नुहोस् । सुत्ने बेला तपाईं पुदिनाका पात पिसेर आफ्नो शरीरमा दल्न पनि सक्नुहुन्छ । यसो गर्दा उडुसको टोकाइबाट बच्न सकिन्छ ।
रातो खुर्सानीः
रातो खुसार्नीको गन्धले पनि उडुसहरू भाग्छन् । तपाईंले रातो खुर्सानीको धूलो बनाएर उडुस भएको ठाउँमा स्प्रे पनि गर्न सक्नुहुन्छ । यसो गर्नाले उडुस निष्क्रिय हुन्छ ।
लेवेण्डरः
उडुसले लेवेण्डरको गन्ध सहन गर्न सक्दैन । त्यसैले, तपाईँ लेवेण्डरको पात उडुस भएको कपडामा दल्न सक्नुहुन्छ । लेवेण्डरको पर्फ्युम स्प्रे गर्नाले पनि तिनको प्रकोपबाट बच्न सकिन्छ ।
रोजमेरीः
उडुस रोजमेरीको गन्धले पनि भाग्छ । तिनको नियन्त्रणका लागि तपाईं रोजमेरीको स्प्रे बनाएर पनि सम्भाव्य ठाउँहरूमा छर्कन सक्नुहुन्छ । राति यो विधिको प्रयोग गरी ढुक्कसँग निदाउनुहोस् ।
नीलगिरीः
नीलगिरीमा औषधीय गुण हुनुका साथै उडुस मार्ने क्षमता पनि हुन्छ । तपाईं यसको केही थोपा उडुस भएको ठाउँमा छर्कन सक्नुहुन्छ । साथै, नीलगिरीको तेल, रोजमेरी तथा लेवेण्डरको स्प्रे बनाई छर्किएर पनि उडुसबाट छुटकारा पाउन सकिन्छ ।
बिनका पात:
उडुसले हैरान पारेको खण्डमा हामीले बिनका पातहरूको प्रयोग गर्यौँ भने पनि उडुस समस्याबाट सजिलैसँग छुटकारा मिल्नुका साथै मानिसहरूले उचितको निन्द्रा प्राप्त गर्न सक्छन् । तपाईं पनि बिनका पात तथा रसको प्रयोग गरी उडुस निर्मूल पार्न सक्नुहुन्छ ।
टी ट्री स्प्रेः
टी ट्रीको तेल एण्टी माइक्रोबियलको रूपमा परिचित छ । उडुसबाट छुटकारा पाउन पनि यो उत्तिकै उपयोगी छ । यसको प्रयोगका लागि टी ट्रीको तेलको एउटा ठूलो सिसी खरीद गर्नुहोस् । यसमा अलिकति पानी मिसाएर केही पातलो बनाउनुहोस् । अब यसलाई स्प्रे बोतलमा भरेर भित्ता, पलङ, दराज, फर्निचर, डसना, कपडालगायत सामग्रीमा छर्कनुहोस् ।
नीमको तेलः
नीमको तेल उत्तर भारतमा पाइने नीमबाट निकालिन्छ । यसमा धेरै एण्टी माइक्रोबियल गुण हुन्छन् । कीराहरू टाढा राख्न यसको प्रयोग गरिन्छ । नीमको तेल औषधि पसलमा पाइन्छ । यसको प्रयोग उडुस भएको ठाउँ तथा घरको सबै भागमा छर्केर गर्न सकिन्छ ।
