काठमाडौं । सत्ता साझेदार दल नेकपा (एकीकृत समाजवादी)ले एमसीसी सम्झौताको विरोधमा देशव्यापी आन्दोलन गर्ने भएको छ ।
बुधवार बसेको एकीकृत समाजवादीको मोर्चा संगठनको बैठकले फागुन १ गते देशभर एकैपटक एमसीसीको विरोधमा प्रदर्शन गर्ने निर्णय गरेको हो ।
सो दिन दिउँसो २ बजे देशका ७७ वटै जिल्लामा एकसाथ विरोध प्रदर्शन गर्ने निर्णय गरेको मोर्चा संगठन प्रमुख तथा पार्टी उपमहासचिव डा विजयकुमार पौडेलले जानकारी दिए ।
विरोध प्रदर्शनका लागि पार्टीका जनवर्गीय तथा पेशागत संगठनहरुलाई निर्देशन समेत दिइएको उनले बताए ।
अब बस्ने संसद बैठकबाट एमसीसी प्रस्ताव पास गर्ने सरकारको तयारी छ । सत्ता गठबन्धनभित्रै पनि एमसीसीका बारेमा एकमत हुन सकिराखेको अवस्था छैन ।
सत्ता साझेदार एकीकृत समाजवादीले एमसीसीका केही बूँदा आपत्तिजनक रहेको भन्दै विना संशोधन पास गर्न नहुने अडान राखेको छ ।
यता, एमसीसी मुख्यालयले भने हुबहु सम्झौता पास गर्न फागुन १६ को समयसीमा तोकेको छ ।
