काठमाडौँ । नेपाली कांग्रेस संसदीय दलको बैठकमा उपप्रधानमन्त्री एवं गृहमन्त्री नारायणकाजी श्रेष्ठमाथि छोरी कुटेर बुहारी तर्साउन खोजेको आरोप लगाइएको छ ।
बैठकमा आफ्नो धारणा राख्ने क्रममा सांसद रामहरि खतिवडाले भन्नुभयो, “अहिले गृहमन्त्रीको पारा भएन। हामी पनि सरकारमै छौँ। तर पनि हामीलाई तर्साउन खोज्दैछन् ।”
सुन प्रकरणमा आवाज रोक्नका लागि पार्टीका सांसद सुनिल शर्मालाई पक्राउ गरेको भन्दै उहाँले भन्नुभयो, “उहाँले पहिला कुरा सुनेर पक्राउ गर्नुपर्ने तर, उहाँले बोली बन्द गराउन थुन्न लाग्नुभयो ।”
सांसद खतिवडाले सुशासनको कुरा गर्ने माओवादी लुम्बिनी विकास कोषको उपाध्यक्ष डा ल्हारक्याल लामालाई नियुक्ति गरेको भन्दै मायादेवी मन्दिर पुन: निर्माणका लागि ७ करोड दान दिने भनिएको पैसा कहाँबाट आयो त्यसको छानबिन गर्नुपर्ने माग गर्नुभयो ।
