एजेन्सी । लगातार दोस्रो हारपछि भारतले तेस्रो टि२० आई खेलमा घरेलु टोली वेस्ट इन्डिजलाई पराजित छ । शीर्षक्रमका ब्याटर सूर्यकुमार यादवको सानदार ब्याटिङमा भारतले वेस्ट इन्डिजलाई ७ विकेटले हराएको हो । यससँगै पाँच खेलको सिरिजमा वेस्टइन्डिज २–१ ले अघि छ ।
जितको लागि १ सय ६० रनको लक्ष्य पछ्याएको भारतले १७.५ ओभरमा ३ विकेट गुमाउँदै पूरा गर्यो । भारतको जितमा सूर्यकुमार यादवले ८३ रनको योगदान दिए । उनले ४४ बलमा १० चौका र ४ छक्का प्रहार गरे ।
डेब्यू खेल खेलेका ओपनर यशस्वी जैसवाल एक रनमा आउट हुँदा शुभमन गिल ६ रन बनाएर पेभिलियनमा फर्किएका थिए । यस्तै, तिलक बर्मा ३७ बलमा ४ चौका र १ छक्कासहित ४९ र हार्दिक पान्ड्या २० रनमा नटआउट रहे ।
वेस्ट इन्डिजका अल्जारी जोशेफले २ विकेट लिए भने ओबेद म्याककोयले १ विकेट लिए ।
त्यसअघि गयाना क्रिकेट मैदानमा टस जितेर पहिला ब्याटिङ रोजेको वेस्ट इन्डिजले निर्धारित २० ओभरमा ५ विकेटको क्षतिमा १ सय ५९ रन बनाएको थियो ।
वेस्ट इन्डिजका कप्तान रोभम्यान पावेल १९ बलमा १ चौका र ३ छक्कासहित ४० रनमा नटआउट रहेका थिए । ओपनर ब्रेन्डन किंगले ४२ रन बनाउँदा कायल मेयर्स २५ रनमा क्याच आउट भए । जोनसन चाल्र्स १२ रनमा एलबीडब्लू आउट हुँदा निकोलस पुरन २० र शिम्रन हेटमायर ९ रनमा आउट भए ।
भारतको जितमा स्पिनर कुलदीप यादवले सर्वाधिक ३ विकेट लिँदा अक्षर पटेल र मुकेश कुमारले समान एक विकेट लिए ।
यस सिरीजको पहिलो खेलमा वेस्ट इन्डिज ४ रन र दोस्रो खेलमा दुई विकेटले विजयी भएको थियो । चौथो खेल शनिबार र पाँचौं खेल आइतबार हुनेछ ।
