काठमाडौँ । नेकपा (माओवादी केन्द्र) का अध्यक्ष पुष्पकमल दाहाल प्रचण्डले पार्टी र नेतृत्वविरुद्ध घेराबन्दी भइरहेको बताउनुभएको छ ।
बुधबारदेखि जारी केन्द्रीय समिति बैठकलाई आइतबार सम्बोधन गर्दै उहाँले नेतृत्वविरुद्ध मुद्दा लगाउन खोजेकै कारण तत्कालीन प्रधानन्यायाधीश चोलेन्द्रशम्शेर जबराविरुद्ध महाअभियोग दर्ता गर्नु परेको बताउनुभयो ।
‘“तिनका षड्यन्त्र परास्त गर्न राजनितिक दलले पनि सहयोग गरेर तिनलाई महाअभियोग लगाउनु पर्ने अवस्था आयो”, अध्यक्ष प्रचण्डले भन्नुभयो, “हामीमाथि मुद्दा लगाउन खोज्नुको पछाडि विचार वर्ग पक्षधरता थियो र आज पनि छ ।”
उहाँका अनुसा आज पनि नेतृत्व र पार्टीमाथि घेराबन्दी छ, अझै पनि जेल हाल्ने कुरा गरेका छन् ।
अध्यक्ष प्रचण्डले यो बैठकबाट पार्टी मुख्य नेतृत्वको वरिपरि एकताबद्ध हुने स्थिति बनेको उल्लेख गर्दै भन्नुभयो, “वाद, प्रतिवाद र संवादमार्फत पार्टी एकढिक्का र एकताबद्ध भयो भन्ने लागेको छ ।” तीन महिना अभियान चलाएपछि पार्टी नयाँ बन्ने उहाँको भनाइ थियो ।
