काठमाडौँ । नेकपा (माओवादी केन्द्र) का अध्यक्ष पुष्पकमल दाहाल प्रचण्डले पार्टीको जारी केन्द्रीय समितिको बैठकमा बोल्न बाँकी केन्द्रीय सदस्यहरुलाई लिखितरुपमा आफ्ना भनाइ टिपाउन आग्रह गर्नुभएको छ ।
प्रज्ञा भवनको हलमा पाँच दिनदेखि जारी बैठकमा उहाँले हलको बुकिङ आइतबारसम्म मात्र भएकाले पदाधिकारी तथा केन्द्रीय सदस्यहरुलाई सक्दो छिटो बैठक सक्न आग्रह गर्नुभयो ।
“एकेडेमीको हल आजसम्म मात्रै बुकिङ छ । भोलि अर्कैको कार्यक्रम छ । यति संख्या अट्ने अर्को हल खोज्दा पाइएन”, उहाँले भन्नुभयो, “‘जे कुरा छ, अब लिखितमै दिने हो, त्यहीँबाट सम्बोधन हुन्छ । बैठक आज जसरी पनि सकौँ, संसद् बैठक पनि हाम्रै पार्टीकै मिटिङका कारण सारिएको छ, त्यसो त गर्न भएन नि ।”
यद्यपि नेताहरुले अझै बोल्न बाँकी १५० सदस्य रहेको भन्दै तिनले पनि मौका पाउनुपर्ने बताएका थिए । अध्यक्ष प्रचण्डले लगभग कुराहरु आइसकेको, अब दोहोरिने क्रममा रहेको भन्दै बाँकीले आफ्नो नाम खातामा टिपाउन र सुझाव राख्न आग्रह गर्नुभएको थियो ।
नेताहरुका अनुसार केन्द्रीय सदस्यहरुले प्रचण्डको प्रस्तावमा सहमति बताएका छन् । प्रधानमन्त्री निवास बालुवाटारमा माओवादी केन्द्र पदाधिकारीको बैठक सकिनेबित्तिकै केन्द्रीय समिति बैठक कमलादीमा सुरु हुनेछ । आइतबार अध्यक्ष प्रचण्डले उठेका प्रश्नहरुको जवाफ दिनुहुनेछ ।
केन्द्रीय समिति एक बजे बस्ने भनिए पनि बालुवाटार बैठकका कारण त्यो धकेलिने सम्भावना छ । बैठकमा कुनै पनि लिखित डकुमेन्ट आउने सम्भावना करिब सकिएको बताइएको छ ।
