काठमाडौं । नेपाली कांग्रेसका नेता डा शेखर कोइरालाले राजश्व अनुसन्धानको प्रमुखमा प्रधानमन्त्री पुष्पकमल दाहाल ‘प्रचण्ड’ को पिए नवराज ढुंगानालाई नियुक्त गर्नु गम्भीर विषय भएको बताएका छन् ।
नेपाल प्रेस युनियन काठमाडौंको कार्यक्रमा बोल्दै डा. कोइरालाले एक साताअघिसम्म प्रधानमन्त्रीको पिए राजश्व अनुसन्धानको प्रमुख बनाएर पठाइनु र अनुसन्धानमा सीआईबी संलग्न नगराइनु गम्भीर विषय रहेको आशंका जनाएका छन् ।
कोइरालाले सुन तस्करीको छानबिनमा राजश्व अनुसन्धान विभागमात्र संलग्न गराएर प्रहरीलाई बाइपास गरिएकोमा शंका गर्दै भने, ‘राजश्व अनुसन्धान विभाग विगतमा अर्थमन्त्रालय मातहत थियो केपी ओलीजीको पालामा प्रधानमन्त्री मातहत लगियो । शेरबहादुरजीको पालामा हामीले पटकपटक यो अर्थमै लैजाउँ भनियो तर अहिलेसम्म लगिएन । यो संकेतमात्र गरेको हो बुझ्नुस् । राजश्व अनुसन्धानको डीजी सुन तस्करीको बाहिर आउनुभन्दा १० दिन हो कि एक साताअघिसम्म प्रधानमन्त्रीको पिए थिए । अनुसन्धानमा सीआईबीलाई संलग्न गराइएको छैन भनेपछि यसबाट बुझ्नुस् ।’
कोइरालाले काण्डहरू आएका बेला तीन दलका शीर्ष नेताहरू गोप्य छलफलमा बस्ने गरेको र पछिल्लोपटक पनि यस्तै भएको बताए ।
