एजेन्सी । १९८६ मा, एक जर्मन व्यक्ति स्विट्जरल्याण्डको प्रतिष्ठित म्याटरहर्न पर्वतको नजिक आरोहण गर्दा बेपत्ता भयो । अहिले ३७ वर्षपछि उनको शवको अवशेष फेला परेको छ । डिएनए परीक्षणपछि भेटिएको शव बेपत्ता ३८ वर्षीय आरोहीको भएको पुष्टि भएको थियो ।
वालिस क्यान्टोनका प्रहरीका अनुसार शव १२ जुलाईमा फेला परेको बताएको छ । जर्मेटको थियोडुल ग्लेशियरमा पदयात्रा गर्दै आएका आरोहीहरूले यो खोज गरेको थियो । प्रहरीका अनुसार सन् १९८६ देखि बेपत्ता भएका आरोहीको डिएनए परीक्षणबाट पहिचान भएको हो ।
१९८६ सेप्टेम्बरमा ३८ वर्षीय जर्मन आरोही ट्रेकिङको लागि गएपछि फिर्ता नआएको रिपोर्ट गरिएको थियो । यद्यपि, शव फेला परेपछि ती व्यक्तिको पहिचान वा मृत्युको अवस्था भने प्रहरीले खुलाएको छैन ।
हिउँमा टाँसिएको रातो फीता लगाएको आरोहीको जुत्ताको तस्बिर प्रहरीले साझा गरेको थियो । हिमनदी घटेका कारण प्राय: मृत आरोहीहरूको शव देखिन्छ ।
स्वीस मौसमविद् र अन्य विज्ञहरूले हालैका वर्षहरूमा देशका हिमनदीहरू तीव्र गतिमा पग्लिरहेको बताएका छन् । यसका लागि उनीहरु मानव निर्मित जलवायु परिवर्तनलाई केही हदसम्म दोष दिन्छन् ।
हिमनदी पग्लिँदा केही दशकयता बेपत्ता आरोहीको शव फेला परेको छ । २०१५ मा, दुई युवा जापानी आरोही को शव बरामद भएको थियो । ती शव सन् १९७० को हिमपहिरोमा म्याटरहर्नमा हराएका आरोहीहरूको थिए । उनीहरुको डिएनए परीक्षणबाट पहिचान भएको थियो ।
