बुटवल । नेपाली कांग्रेसका केन्द्रीय सदस्य तथा प्रतिनिधिसभा सदस्य प्रदीप पौडेलले सुन काण्डमा राम्रोसँग अनुसन्धान नभए गृहमन्त्री र अर्थमन्त्रीको राजीनामा माग्ने अवस्था आउन सक्ने बताउनुभएको छ । पौडेलले भरिया मात्रै नभएर जरैसम्म छानबिन गर्नुपर्ने बताउनुभयाे ।
आइतबार बुटवलमा नेपाल प्रेस युनियनले आयोजना गरेको पत्रकार सम्मेलनमा उहाँले सुन बरामद प्रकरणमा भरिया मात्रै नभएर जरैसम्म छानबिन गर्नुपर्ने बताउनुभयो । भ्रष्टाचार नियन्त्रणका लागि दलहरू सच्चिन आवश्यक रहेको उहाँको भनाइ थियो ।
फरक प्रसङ्गमा उहाँले सङ्घीयतालाई बलियो बनाउनका लागि सांसदहरूको सङ्ख्या घटाउनु पर्ने धारणा राख्नुभयो । हालै सम्पन्न कांग्रेस केन्द्रीय समितिको बैठकमा यो विषयले प्रवेश पाएको उहाँले बताउनुभयो ।
सङ्घीय संसद्को सङ्ख्या घटाएर २०१ सदस्यीय बनाउने र सोही अनुसार प्रदेशसभामा समेत सङ्ख्या घटाउनु पर्ने उहाँको भनाइ थियो । नेता पौडेलले घटाइएको सङ्ख्यामा सबै जातजाति, समुदाय, महिला, सीमान्तकृतलगायत सम्पूर्णको समान प्रतिनिधित्व हुने गरी निर्वाचन प्रणाली लागू गर्नुपर्ने बताउनुभयो । यसरी राजनीतिक प्रशासन र खर्चलाई घटाएर ब्युरोक्रेसीमा हुने खर्चलाई पनि घटाउन सकिने उहाँको भनाइ थियो ।
पूँजीगत खर्चभन्दा चालु खर्च ४ गुणा बढी भएको उल्लेख गर्दै उहाँले त्यसलाई पनि पूरा खर्च गर्न नसकिएको बताए । पछिल्लो १५ वर्षको तथ्याङ्कमा सबैभन्दा बढी ५८ प्रतिशत मात्रै पूँजीगत खर्च हुन सकेको उहाँले बताउनुभयो ।
नेता पौडेलले भ्रष्टाचार, अनियमितताले नै यति धेरै बेरुजु निस्किएको भन्दै यसको नियन्त्रणका लागि पनि संसद् सङ्ख्या घटाउनु पर्नेमा जोड दिनुभयो ।
पौडेलले नेपाली कांग्रेस केन्द्रीय समितिले बैठकमा भएको लाइभले अब निरन्तरता पाउने बताउँदै अब पछाडि फर्कन नसक्ने बताउनुभयो ।
