काठमाडौँ । नेपाली कांग्रेसले ७७ जिल्लामा केन्द्रीय सदस्यलाई खटाउने भएको छ । पार्टी संगठन सुदृढीकरणका लागि केन्द्रीय सदस्यलाई दुई चरणमा जिल्लामा खटाउन लागिएको बताइएको छ ।
पार्टी केन्द्रीय समितिको निर्णयअनुसार दुई चरणमा गरिने कार्यक्रम फरक फरक प्रकृति र उद्धेश्यका छन् । पार्टीको आन्तरिक सांगठनिक सुदृढीकरण र राष्ट्रव्यापी अभियानका लागि केन्द्रीय सदस्यहरुलाई जिल्ला तोकेर जिम्मेवारी दिन लागिएको छ ।
पहिलो चरणमा जिल्ला जाने केन्द्रीय सदस्य पूर्णरुपमा पार्टीको आन्तरिक संरचनाका लागि कार्य गर्नेछन् । महामन्त्री गगन थापाका अनुसार यस अवधिमा पार्टीको आन्तरिक कार्यमा केन्द्रीय सदस्यहरुले जिम्मेवारी निर्वाह गर्नेछन् ।
सांगठनिक सुदृढीकरणका लागि साउन २० देखि ३० गतेसम्मको समय तोकिएको छ । अपूर्ण रहेको कार्यसमिति छ भने सबै संरचनामा पूर्णता दिने कार्य हुन्छ थापाले बताउनुभयो । “बैठक बस्न लगाउने, रिपोर्टिङ लिने, सम्मेलन भएको छैन भने मिति तोक्न लगाउने, सम्मेलन भएको रहेछ भने रिपोर्ट दिन लगाउने कार्य केन्द्रीय सदस्यहरुले गर्नुहुन्छ”, उहाँले भन्नुभयो ।
केन्द्रमा बनेको जस्तै वार्षिक क्यालेण्डर बनाउन लगाउने जिम्मेवारी पनि केन्द्रीय सदस्यलाई दिइने छ । “केन्द्रीय सदस्यहरुले भ्रातृ संस्था, शुभेच्छुक संस्था, विभागलाई सबैलाई पूर्णता दिन लगाउने काम गर्नुहुन्छ । नयाँ क्रियाशील वितरण, नवीकरण, अनलाइन प्रणाली जानकारी गराउने र कार्यान्वयनमा अघि बढाउने काम हुन्छ”, महामन्त्री थापाले भन्नुभयो ।
यही साउन २ गतेदेखि सुरु भएको पार्टी केन्द्रीय समितिको बैठकले प्रत्येक गाउँ वा नगर समितिले ‘सेवा दल’ बनाउने निर्णय गरेको थियो । सेवा दलको कार्यविधि जिल्ला खटिने प्रतिनिधिले केन्द्रबाट लगेका हुन्छन् । त्यसअनुसार सेवा दल गठनको प्रक्रिया सुरु गराउन सहजीकरण केन्द्रीय सदस्यहरुले गर्नेछन् ।
पार्टीभित्र विवादका कारणले आन्तरिक संरचनामा परेको समस्या समाधान गर्न केन्द्रीय सदस्यले भूमिका खेल्ने छन् । “अनुशासनको सिफारिस गर्न पाए पनि अन्तिम निर्णायक तलको समिति हुँदैन,’ महामन्त्री थापाले भन्नुभयो, “प्रतिनिधि भएर खटिएको केन्द्रीय सदस्यले समाधान गर्न सकिनेलाई मिलाउँछन् । आफूले टुंगाउन नसक्ने अवस्था भए केन्द्रमा रिपोर्ट ल्याउँछन् ।’
त्यसैगरी दोस्रो चरणको अभियान भदौ १० देखि २४ गतेका लागि तोकिएको छ । यस अवधिमा नागरिकसँग जोडिएर केन्द्रीय सदस्यहरुले गतिविधि गर्नुपर्ने हुन्छ ।
दोस्रो चरणलाई समुदायमा आधारित ‘राष्ट्रव्यापी अभियान’ भनिएको छ । महामन्त्री थापाले भन्नुभयो, “केन्द्रीय सदस्य समुदायमा जाने नागरिकसँग प्रत्यक्ष कुराकानी गर्ने र उनीहरुको कुरा सुन्ने काम हुन्छ ।”
