एजेन्सी । प्रि सिजनको मैत्रीपूर्ण खेलमा इंग्लिस क्लब आर्सनलले बार्सिलोनाको पोस्टमा गोलको वर्षा गराउदै ५-३ ले हराएको छ ।
पहिलो हाफ २-२ को बराबरीमा सकिए पनि दोस्रो हाफमा बार्सिलोना कमजोर बन्दा आर्सनलसँग पराजित हुन पुग्यो ।
दोस्रो हाफमा सुरुवाती रोजाइका सबै खेलाडी परिवर्तन गरेको बार्सिलोनाले आर्सनलले ३ गोल गर्दा १ गोल मात्र फर्काउन सक्यो।
खेलको सातौं मिनेटमा पोलिस फरवार्ड रोबर्ट लेवान्डोस्कीले बार्सिलोनालाई अग्रता दिलाएका थिए । त्यसपछि १३ औं मिनेटमा आर्सनलका बुकायो साकाको गोलसँगै बराबरीमा फर्कियो । पेनाल्टी क्षेत्रभित्र डिफेन्सले गरेको गल्तीमा उनले गोल गरेका थिए । तर उनले त्यसपछि प्राप्त पेनाल्टीमा भने गोल गर्न सकेनन् ।
३४ औं मिनेटमा ब्राजिलियन राफिन्हाले गोल गर्दै बार्सिलोनालाई अघि बढाए । त्यसपछि पहिलो हाफको २ मिनेट बाँकी रहँदा आर्सनलका काइ हाभर्ट्जले गोल गर्दै खेल २-२ माबराबरी गरे ।
लिआन्द्रो ट्रोसार्डले ५५ औं मिनेटमा गोल गर्दै आर्सनललाई अग्रता दिलाएका थिए । त्यस्तै, खेलको ७८ औं मिनेटमा ट्रोसार्डले गोल गर्दै अग्रता दोब्बर पारे । किएरन टिएर्नीको क्रसमा पहिलो टच फिनिस गर्दै उनले आर्सनललाई ४-२ ले अघि बढाए ।
८८ औं मिनेटमा बार्सिलोनाका फेरान टोरेसले गोल गरेका थिए । त्यसको एक मिनेट लगत्तै फाबिओ भिएराले आर्सनलका लागि अर्को गोल थपे ।
अब प्रि सिजनमा बार्सिलोनाले रियल म्याड्रिडसँग जुलाई ३०, एसी मिलानसँग जुलाई २ र टोटेनहमसँग अगस्ट ८ मा खेल्नेछ । यस्तै, आर्सनलले पनि अगस्ट २ मा मोनाकोसँग र अगस्ट ६ मा म्यानचेस्टर सिटीसँग प्रतिस्पर्धा गर्नेछ ।
