एजेन्सी । प्रि सिजनको मैत्रीपूर्ण खेलमा स्पेनिस क्लब रियल म्याड्रिडले म्यानचेस्टर युनाइटेडलाई पराजित गरेको छ ।
रियलका मिडफिल्डर जुड बेलिङघम र फरवार्ड जोसेलुले गोल गरेपछि म्यानचेस्टरलाई २-० ले हराएको हो । रियलले दुवै हाफमा १/१ गोल गरेको थियो ।
खेलको छैटौं मिनेटमा नै बेलिङघमले एन्टोनियो रुडीगरले डिफेन्सबाट खेलेको लामो पासलाई नियन्त्रण गर्दै दोस्रो टचमा फिनिस गरे । उनले अफसाइड ट्रयाप बिट गरेपछि अघि बढेका गोलरक्षक आन्द्रे ओनानाको माथिबाट गोल गरेका थिए ।
यस्तै, जोसेलुले खेलको अन्त्यतिर गोल गर्दै अग्रता दोब्बर पारे ।लुकास भाज्केजले दिएको क्रसलाई उनले ओभरहेड किकमार्फत गोल गरेका हुन् ।
रियलले यसअघि भएको मैत्रीपूर्ण खेलमा एसी मिलानलाई ३-२ को अन्तरले हराएको थियो । अब क्लबले जुलाई ३० मा बार्सिलोना र अगस्ट ३ मा युभेन्टससँग खेल्नेछ ।
यस्तै, म्यानचेस्टरले जुलाई ३१ मा बोरूसिया डर्टमुन्डसँग ,अगस्ट ५ मा लेन्ससँग तथा अगस्ट ६ मा एथ्लेटिक बिल्बाओसँग खेल्दैछ ।
