जनता समाजवादी पार्टीका नेता महन्थ ठाकुर र उपेन्द्र महतो बालुवाटार पुगेका छन् । उनीहरु केही बेरअघि प्रधानमन्त्री निवास बालुवाटार पुगेका हुन् ।
बालुवाटार स्रोतका अनुसार उनीहरुलाई प्रधानमन्त्री केपी ओलीले नै भेट्न बोलाएका बताएको छ ।
केही दिनअघि प्रधानमन्त्रीमा केपी ओलीलाई मत नदिएर स्वतन्त्र बसेको जनता समाजवादी दलको महन्थ र उपेन्द्रको गुटका उनीहरु केही दिन यतादेखि फेरि बालुवाटार धाउन थालेका छन् ।
त्यसपछि पनि दुई दिनमात्र अघि सो दलको अर्काे खेमाका उपेन्द्र यादवको समूहसँग मिलेर महन्थ ठाकुरले जसपा सरकारमा नजाने बरु आफ्नो नेतृत्वमा सरकार बनाउन पहल गर्ने बताएको थियो ।
त्यसपछि पनि नेपालको राजनीतिमा धेरै उतार चढाव आएको छ । जस्तो कि आजै भएको राष्ट्रिय सभाको निर्वाचनमा नेकपा एमालेका पूर्व माओवादी नेता बादल पराजय भएका छन् भने एमालेकै माधव नेपालको प्रस्तावमा चुवनामा उठेका डा.खिमलाल देवकोटा विजयी भएका छन् ।
त्यस्तै आजै सर्वाेच्च अदालतले पूर्व माओवादी खेमाका बादलसहितका सात जना मन्त्रीलाई पदमुक्त गरिदिएको छ ।
त्यस्तै अघि साँझ बसेको मन्त्रिपरिषदको बैठकले संसद बोलाउन राष्ट्रपतिलाई आह्वान गर्ने तर आफूले विश्वासको मत नलिने भन्दै संविधानको धारा ७६ को उपधारा ५ बमोजिम सरकार गठनका लागि मार्ग प्रसस्त गर्ने निर्णय गरेको छ ।
यस्तो विकसित राजनीतिक परिवर्तित अवस्थामा प्रधानमन्त्रीले जसपाका नेतालाई भेट्न बोलाउनु र उनीहरु बालुवाटार जानुको पछाडि पनि ठूलै राजनीतिक कारण रहेको बताइएको छ ।
