काठमाडौं । अखिल नेपाल फुटबल संघ (एन्फा)ले यू-१९ र यू-१६ फुटबल टिमको मुख्य प्रशिक्षक नियुक्त गरेको छ ।
सोमबार एन्फाले यू-१९ राष्ट्रिय फुटबल टोलीको मुख्य प्रशिक्षकमा सुनिल श्रेष्ठ र यू-१६ को मुख्य प्रशिक्षकमा रवीन्द्र सिलाकारलाई नियुक्त गरेको हो ।
एन्फाका महासचिव किरण राईले दुवै प्रशिक्षकलाई नियुक्ति पत्र हस्तान्तरण गरेका हुन् ।
पुरुष साफ च्याम्पियनसिप फुटबल प्रतियोगिताको लागि सुनिल र रवीन्द्रलाई एन्फाले प्रशिक्षक बनाएको हो । सुनिल श्रेष्ठ शहीद स्मारक ए डिभिजन लिगमा जावलाखेल युथ क्लबको मुख्य प्रशिक्षक थिए भने रविन्द्र सिलाकार संकटाका प्रशिक्षक थिए ।
यस्तै, यु-१९ राष्ट्रिय टोलीको सहायक प्रशिक्षकमा सचिन्द्र धिमाल र गोलकिपिङ प्रशिक्षकमा राजु सिंह नियुक्त भएका छन् । टिम म्यानेजरमा भने दिवाकर घले रहनेछन् ।
त्यसैगरी यू-१६ टोलीको सहायक प्रशिक्षकमा सिताराम घिमिरे र गोलकिपर प्रशिक्षकमा गंगाराम देउजा नियुक्त भएका छन् ।
अब सुनिल श्रेष्ठले आगामी सेप्टेम्बर २१ देखि ३० सम्म काठमाडौंमा हुने साफ यू–१९ च्याम्पियनसिपमा नेपालको यू-१९ टोलीको प्रशिक्षण सम्हाल्नेछन् भने रवीन्द्रले सेप्टेम्बर १ देखि १० सम्म भुटानमा हुने साफ यू-१६ च्याम्पियनसिपमा नेपाली यू–१६ टोलीको प्रशिक्षण सम्हाल्नेछन् ।
साफले सोमबार यू-१९ साफ र यू-१६ साफ च्याम्पियनसिपको खेल तालिका सार्वजनिक गरेको थियो । साफ यू-१९ मा नेपाल पाकिस्तान र माल्दिभ्स समूह ए मा छन् । नेपालले पहिलो खेल पाकिस्तानसँग खेल्नेछ ।
यस्तै ,साफ यू-१६ मा नेपाल साविक विजेता भारत र बंगलादेशसँगै समूह ए मा परेको छ । नेपालले पहिलो खेल बंगलादेशसँग खेल्नेछ ।
