एजेन्सी । साउथका चर्चित अभिनेता सूर्याले २३ जुलाईमा आफ्नो जन्मदिन मनाउँदै थिए । यसैबीच उनको पोस्टर लगाउन पोलमा चढेका दुई फ्यानको दुःखद मृत्यु भएको छ ।
उनीहरु दुवैको करेन्ट लागेर मृत्यु भएको हो । यो घटना आन्ध्र प्रदेशको पाल्नाडु जिल्लाको हो ।
दुवै फ्यान कलेज पढ्न गएका थिए । उनीहरु दुवैले सूर्याको पोस्टर लगाउन खोज्दै गर्दा बिजुलीको तारमा फलामको रड ठोक्कियो । दुवै युवाको करेन्ट लागेर घटनास्थलमै मृत्यु भयो । प्रहरीले दुवैको शव पोष्टमार्टमका लागि पठाएको छ ।
पाल्नाडु जिल्लाको मोपुलावरीपालम गाउँमा पोलुरी साई र नक्का वेंकटेश नामका दुई जना पुरुष सूर्याको जन्मदिनको झण्डा फहराउन पोलमा चढे । फ्लेक्समा फलामको रड जोडिएको थियो । सोही क्रममा रड ओभरहेड बिजुलीको तारसँग सम्पर्कमा आएको थियो ।
मृत्यु भएका पोलुरी साईकी बहिनी अनन्याले दाईको मृत्युको लागि कलेज प्रशासनलाई दोष दिएकी छिन् । एएनआईसँग कुरा गर्दै उनले भनिन्, ‘हामीले कलेजका लागि धेरै शुल्क तिर्छौँ । कलेजमा भर्ना हुनु अघि, उनीहरूले हामीलाई विद्यार्थीहरू सुरक्षित रहने र अनुगमन गरिने आश्वासन दिन्छन् । तर कलेज होस्टेलमा न त विद्यार्थीहरुको अनुगमन छ न त उनीहरुको सुरक्षाका लागि कुनै पहल भएको छ ।’
सूर्या हिजो ४८ वर्षका भए । उनको जन्मदिनमा उनको आगामी फिल्म ‘कंगुवा’को पहिलो झलक सार्वजनिक भएको छ । यसमा सूर्या योद्धाको भूमिकामा देखिएका छन् । यो हेरेपछि यो फिल्म एक्सन दृश्यले भरिपूर्ण हुनेछ भन्ने अनुमान लगाउन सकिन्छ ।
