काठमाडौँ । नेपाली कांग्रेसका केन्द्रीय सदस्य प्रदीप पौडेलले पार्टी संकटमा पुगेको बताएका छन्। शुक्रबारको केन्द्रीय समितिमा धारणा राख्दै पौडेलले पार्टीलाई संकट पार लगाउन सर्जरी नै गर्नुपर्ने आवश्यकता रहेको बताए ।
उनले लामो समयदेखि पार्टीमा भएका विभिन्न घटनाले पलायनता, निष्कृयता र विद्रोहको मानसिकता देखिन थालेकोले यो स्थिति अन्त्य गर्नुपर्ने बताए। ‘कांग्रेस संकटमा छ भन्ने मानेर कसैको दाइ, भाइ र अनुयायी नभई आत्ममूल्यांकन गर्न जरूरी छ,’ पौडेलले भने, ‘पार्टीलाई सुधार गर्न जरूरी छ, सर्जरीकै आवश्यकता छ।’
पौडेलले पार्टीलाई रूपान्तरण गरेर लैजानुपर्ने र त्यसका लागि महामन्त्रीहरूले पेश गरेको एजेन्डा मात्र पर्याप्त नहुने उल्लेख गरे।
उनले कांग्रेसको सदस्यता वितरण खुकुलो बनाउनुपर्ने बताउदै भने, ‘कांग्रेस मासबेस पार्टी हो। यहाँ सदस्यताको वर्गीकरण गर्न हुँदैन। लिन चाहनेलाई सजिलोसँग सदस्यता दिनुपर्छ’।
कांग्रेसले निर्वाचन प्रणाली बदल्न नेतृत्व लिनुपर्ने र प्रतिनिधिसभा समावेशीसहित २०१ सिटको पूर्ण प्रत्यक्ष हुनुपर्ने उनको भनाइ छ। उनले पार्टीका सबै तहका चुनाव प्रत्यक्ष हुनुपर्ने र प्राइमरी इलेक्सन गरेर उम्मेदवारहरू छनौट गर्नुपर्नेमा जोड दिए। उनले समानुपातिकमा एक पटक मात्रै अवसर दिनुपर्ने बताउदै भने, ‘मुख्यमन्त्री र मन्त्री पनि २ पटक भन्दा बढी हुन दिनु हुँदैन ।’
कार्यसम्पादन समितिका निर्णय २ महिनाभित्र केन्द्रीय समितिबाट अनुमोदन नभए बदर हुने व्यवस्था गर्न उनको माग छ। उनले भ्रष्टाचारमा जोडिएकाहरूलाई छानबिनमा सहयोग गरिनुपर्ने बताए। ‘गणतन्त्रपछिका चर्चित घटनाको छानबिनको नेतृत्व कांग्रेसले गर्नुपर्छ। उच्च पदस्थको सम्पत्ति छानबिन गर्नुपर्छ,’ उनले भने।
