रोल्पा । रोल्पाको जंगलमा एसएमजीमा प्रयोग हुने नौ सय ७० राउन्ड गोली फेला परेको छ । त्रिवेणी गाउँपालिका २ रामपुर गाउँ नजिकैको एक सामुदायिक वनको बाँस घारीमा प्लाष्टिकले बेरी राखेको अवस्थामा ती गोली फेला परेका हुन्।
प्रहरीका अनुसार एसएमजीमा प्रयोग हुने म्याग्जिन २३ थान, एम १६ को म्याग्जिन १ थान, एलएमजी म्याग्जिन १ थान गरी २५ थान म्याग्जिन भेटिएको जनाएको छ ।
त्यस्तै एके ४७ मा प्रयोग हुने गोली ७ सय ५२ थान, ७.६२ मिमि हतियारको गोली २ सय ८ थान र ९ एमएमको गोली १० राउन्ड गरी ९ सय ७० राउन्ड गोली बरामद भएको जिल्ला प्रहरी प्रमुख डिएसपी नरेशराज सुवेदीले बताए। स्थानीयको सुराकीको आधारमा प्रहरी त्यहाँ पुगेर हेर्दा ठूलो मात्रामा गोली बरामद भएको थियो ।
उक्त क्षेत्रमा नेपाली सेनाको बटुक दल गणको दहवनस्थित गुल्मको टोलीले थप खोज तथा अनुसन्धान जारी राखेको डिएसपी सुवेदीले बताए।
गत वर्षमात्रै त्रिवेणी गाउँपालिका-७ मा बेवारिसे बम विष्फोट हुँदा बाख्रा गोठाला गएका ४ बालकको मृत्यु भएको थियो।
