काठमाडौँ । नेपाली कांग्रेसले पार्टी सदस्यता वृद्धि गर्ने उद्देश्यले ‘घरघर जाउँ, पार्टी सदस्य बनाउँ’ अभियान सुरु गर्ने भएको छ ।
पार्टी कार्यालय सानेपामा मंगलबार सुरु भएको केन्द्रीय समितिको बैठकमा महामन्त्री गगनकुमार थापाले ५ देखि ७ लाख नयाँ सदस्य थप्ने लक्ष्यका साथ यही साउन २० गतेदेखि २०८१ असार ३१ सम्म ‘घरघर जाउँ, पार्टी सदस्य बनाउँ’ अभियान चलाउने प्रस्ताव राख्नुभएको हो ।
उहाँका अनुसार कम्तीमा ५ लाखदेखि ७ लाख नयाँ सदस्य बनाउने उद्देश्यले यो अभियान प्रारम्भ गरिनेछ ।
विसं २०७८ मंसिर–पुसमा भएको १४ औँ महाधिवेशनको समयमा कांग्रेसमा ८ लाख ६६ हजार क्रियाशील सदस्य थिए ।
महामन्त्री थापाले उनीहरुको सदस्यता साउनभित्र उपलब्ध गराइने र भदौ, असोज र कात्तिकमा जिल्ला कमिटीहरुले नवीकरण गर्ने जानकारी दिनुभयो । नयाँ सदस्यका लागि कांग्रेसले अनलाइन प्रणाली सुरु गरेको भन्दै उहाँले यसलाई अझ प्रभावकारी बनाउने बताउनुभयो ।
