एजेन्सी । अर्जेन्टिनियन विश्व चर्चित फुटबल स्टार लियोनल मेसी अमेरिकी सकर क्लब इन्टर मियामीमा औपचारिक रुपमा अनुबन्धित भएका छन् ।
पछिल्लो दुई वर्ष फ्रेन्च क्लब पेरिस सेन्ट जर्मेन (पीएसजी)मा बिताएका मेसीले गत सिजनको अन्त्यसँगै पीएसजी छाड्ने घोषणा गरेका थिए । पीएसजी छाड्ने घोषण गरेसँगै मेसी आफूले दुई दशकभन्दा बढी समय बिताएको बार्सिलोना फर्कने चर्चा पनि निकै चल्यो ।
अर्कोतर्फ उनी साउदी अरब जाने चर्चा पनि नचलेको होइन । तर फरक हल्ला र चर्चाबीच मेसीले अमेरिकी क्लब मियामी रोजेका हुन् । मेसीले एमएलएस क्लब मियामीसँग सन् २०२५ सम्म रहने सम्झौता गरेका छन् ।
‘‘म इन्टर मियामीबाट अमेरिकामा करियरको अर्को कदम चाल्नका लागि उत्साहित भएको छु । यो मेरालागि राम्रो अवसर हो । हामी सबै मिलेर राम्रो परियोजना निर्माण गर्नेछौं । मियामीमा लक्ष्य प्राप्तिका लागि सबै मिलेर काम गर्नेछौं । म यहाँ आफ्नो नयाँ घर बनाउन लागिपरेको छु,’’ सम्झौतापछि मेसीले भने ।
सर्वाधिक सात पटकका बालोन डी’ओर विजेता मेसीलाई जुलाई २१ मा हुने लिग कपको उद्घाटन खेलबाट मियामीको जर्सीमा देख्न पाइनेछ ।
