काठमाडौँ । भारतीय फिल्म सेन्सर बोर्डले अक्षय कुमार स्टारर फिल्म ‘ओ माइ गड २’ को प्रदर्शनमा रोक लगाएको छ। ‘ओएमजी २’ को संवाद र दृश्यमा ध्यान दिंदै पुन: सेन्सर गरेर मात्र फिल्म प्रदर्शनबारे तय गरिने बताइएको छ।
भारतीय सञ्चारमाध्यम दैनिक भास्करका अनुसार बोर्डले फिल्मलाई समीक्षा समितिमा पठाएको छ। आदिपुरुषलाई जस्तै विवाद हुन नदिन यस्तो कदम उठाए सेन्सर बोर्डले जनाएको छ। यसअघि ‘आदिपुरुष’ ले धार्मिक भावनामा ठेस पुर्याएको भन्दै विवाद भएको थियो।
गत महिना रिलिज भएको ‘आदिपुरुष’का केही संवादलाई लिएर भारतभर चर्को आलोचना भएको थियो । विवाद चर्किएपछि उक्त फिल्मको प्रदर्शन नेपालमा समेत रोकिएको थियो ।
‘ओएमजी २’ को टिजर ११ जुलाईमा सार्वजनिक गरिएको थियो। टिजरमा परेश रावललाई नास्तिक, पंकज त्रिपाठीलाई आस्तिक र अक्षय कुमारलाई भगवान शिवको रूपमा प्रस्तुत गरिएको छ।
अमित राय लिखित तथा निर्देशित फिल्ममा अक्षय, परेश र पंकजसँगै यामी गौतमको मुख्य भूमिका छ। यो फिल्म अगस्ट ११ देखि प्रदर्शन हुँदैछ।
