भक्तपुर । वरिष्ठ पत्रकार बलराम प्यासीले असार १८ गते बालकोट चोक नजिक मुलसडकमा फेला पारेको लत्ता कपडासहितको झोला सम्वन्धित धनीलाई बुझाईदिएका छन् ।
सुर्यविनायक नगरपालिका वडा नं २ का वडाध्यक्ष एवम् अधिवक्ता प्रदिप कार्की तथा बालकोट प्रहरी प्रभागकी प्रहरी सहायक निरीक्षक ज्योति खडकाको रोहवरमा मंगलबार वडा कार्यालयमा पत्रकार प्यासीले सो सामान सम्वन्धित व्यक्ति सचेत चुडाललाई हस्तान्तरण गरेका हुन् ।
भेटिएका सामानहरुमा अमेरिकाबाट पठाएको एकजोर सेतो स्पोर्ट सुज, एकथान अमेरिकी गगल्स (चस्मा) एकथान सर्ट, एकथान टिसर्ट र दुई पाकेट क्याडबरी चकलेट रहेको र ती सामानको बजार मूल्य करीव २२ हजार रहेको छ । कौशलटारबाट आफ्नो घर ‘बालकोट ग्रिन हाउस’तर्फ जाँदै गरेका प्यासीले सो सामान असार १८ गते सोमबार अपरान्ह २ बजेतिर बालकोटको आशलाल चोकको मुल सडकमा पानीले भिजेको अवस्थामा फेला पारेका थिए ।
फेला परेको सामान उनले तत्कालै सुर्यविनायक नगरपालिका वडा नं २ का वडाध्यक्ष कार्कीलाई वडा कार्यालयमै गएर बालकोट प्रहरी प्रभागका प्रहरी हवलदार उत्सव थापाको रोहवरमा जिम्मा लगाएका थिए । भेटिएको सामान वडा कार्यालयमा रहेको जानकारी वडाध्यक्ष कार्कीले सोही दिन तस्वीरसहित सामाजिक सञ्जालमार्फत सार्वजनिक गरेका थिए ।
सामाजिक सञ्जालको सूचनामार्फत बालकोटकै सुदिप भण्डारीले सामान हराउने व्यक्तिको पहिचान गराएर वडाध्यक्ष कार्कीलाई सम्पर्क गराएपछि सम्वन्धित व्यक्ति सचेत चुडाललाई असार १९ गते वडा कार्यालयमा बोलाई सामान हस्तान्तरण गरिएको थियो । सो सामान अमेरिकाबाट पुजा देवकोटाले बुटबल बस्ने आफ्नो बुबाआमा र आफन्तलाई पठाएकोमा अमेरिकाबाट सामान ल्याउने व्यक्तिसंग बानेश्वरबाट चुडालले संकलन गरि आफ्नो डेरा बालकोटमा जाँदै गरेको अवस्थामा मोटरसाइकलबाट सडकमा खसालेका थिए ।
बानेश्वरबाट मोटरसाइकलको लेगगार्डमा झुण्डयाएर बालकोट डेरातर्फ लैजाने क्रममा कागजको झोला पानीले भिजेर सडकमा खसेपछि पत्रकार प्यासीले सो झोला फेला पारि वडा अध्यक्ष कार्कीलाई बुझाएका थिए । ट्रिटन कलेजमा स्नताक अध्ययनरत चुडालले ती सामान बुधबार नै कुरियर गरि बुटबल पठाइदिएको बताएका छन् ।
सडकमा खसेको सामान वडा कार्यालयमा ल्याएर प्रहरीको रोहबरमा बुझाईदिएकोमा वडाध्यक्ष कार्कीले वरिष्ठ पत्रकार प्यासीलाई धन्यवाद व्यक्त गर्दै बालकोटमा इमान्दार मानिस बस्ने राम्रो कुराको सन्देश दिएकोमा गर्व गरे । वरिष्ठ पत्रकार प्यासी भक्तपुरबाट प्रकाशित हुनेगरेको नेपाल न्यूज साप्ताहिक र प्रक्षेपण दैनिकका कार्यकारी सम्पादक तथा आजकोप्रेस डटकमका सहसम्पादक पनि हुन् ।
