काठमाडौँ । प्रमुख विपक्षी दल नेकपा एमालेले प्रधानमन्त्रीले नैतिकताका आधारमा राजीनामा दिनुपर्ने बताएको छ । बुधबारको प्रतिनिधिसभा बैठक सुरु भएलगत्तै नेकपा एमालेका सांसद रघुजी पन्तले प्रधानमन्त्रीले नैतिकताका आधारमा राजीनामा दिनुपर्ने बताएका हुन् ।
उनले भने ‘प्रधानमन्त्रीको अभिव्यक्तिपछि उहाँले नैतिकताको आधारमा प्रधानमन्त्रीको पदमा बस्नु उपयुक्त हुँदैन । उहाँले राजीनामा दिनुपर्छ । जोसुकै मानिस प्रधानमन्त्री बनोस् , जो दिल्लीतिर नभई नेपालतिरै फर्किने होस् । जसले यो देशको सार्वभौमिकता र स्वाभिमानको रक्षा गर्न सकोस् ।’
उनले अगाडि प्रश्न गरे – ‘ उहाँ जनताको अगाडि कसरी प्रधानमन्त्री भनेर जानुहुन्छ ? यो विषय क्लियर नभएसम्म र प्रधानमन्त्रीको राजीनामा नआएसम्म यो बैठक अगाडि बढ्न सक्दैन ।’
प्रितम सिंहमाथि किरणदीप सन्धुले लेखेको पुस्तक ‘रोड्स टु द भ्यालीः द लिगेसी अफ सरदार प्रितम सिंह इन नेपाल’ विमोचन कार्यक्रममा दाहालले आफूलाई प्रधानमन्त्री बनाउन व्यवसायी प्रितम सिंहले धेरै मिहिनेत गरेको र पटक–पटक दिल्लीसमेत धाएको अभिव्यक्ति दिएका थिए ।
