एजेन्सी । ब्राजिलिय फरवार्ड रोबर्टो फिर्मिनो इंग्लिस क्लब लिभरपुल छोडेर साउदी प्रो लिग क्लब अल–अहलीमा आवद्ध भएका छन् । गत सिजनको अन्त्यमा लिभरपुलसँगको सम्झौता सकिएपछि फ्री एजेन्ट रहेका उनी तीन वर्षको सम्झौतामा अल–अहलीमा गएका हुन् ।
३१ वर्षीय फर्मिनोले लिभरपुलबाट सबै फम्र्याटका ३६२ खेलमा १११ गोल गरेका थिए ।उनी यस सिजन साउदी क्लबहरूले हस्ताक्षर गरेका मध्येका एक चर्चित खेलाडी हुन् । गत साता चेल्सी छोडेका सेनेगलका गोलकिपर एडुआर्ड मेन्डी पनि अल–अहलीमा आवद्ध भएका थिए।
यस्तै, एनगोलो कान्टे र कोउलिबालीले पनि चेल्सी छोडेर साउदी अरब गएका छन् । त्यसअघि करिम बेन्जेमा, रुबेन नेभेस र मार्सेलो ब्रोजोभिकजस्ता स्टार खेलाडी पनि व्यवसायिक फुटबल खेल्न साउदी गइसकेका छन् ।
