काठमाडौं ।आइसिसी विश्वकप छनोटको प्लेअफ अन्तर्गत सातौं स्थानको लागि जारी खेलमा नेपालले आयरल्यान्डलाई जितको लागि २ सय ६९ रनको लक्ष्य दिएको छ ।
जिम्बावेको ताकाशिंका क्रिकेट स्पोर्ट्स क्लबमा टस हारेर पहिला ब्याटिङको निम्तो पाएको नेपालले निर्धारित ५० ओभरमा ९विकेट गुमाउँदै २ सय ६८ रन बनायो ।
नेपालको लागि गुल्शन झाले अर्धशतकीय ईनिङ खेले । गुल्शनले ४१ बलमा ४ चौका र २ छक्काको सहयोगमा आफ्नो अर्धशतक पुरा गरेका थिए । उनी ५७ रनमा नटआउट रहे ।
यस्तै, ओपनर अर्जुन साउदले ३ चौका र २ छक्काको सहयोगमा ४८ रन बनाए । कुशल मल्लले ५ चौका र २ छक्कासहित ४४ रन बनाउदा कप्तान रोहित पौडेल २९ रन बनाएर आउट भए । सन्दीप लामिछानेले ३२ रन जोड्दा भीम सार्कीले २० रन बनाए । यस्तै ओपनर कुशल भुर्तेल ८ रन बनाएर आउट भए भने ज्ञानेन्द्र मल्ल ७ रनमा आउट भए ।
आयरल्यान्डका ब्यारी म्याकार्थीले १० ओभरमा १ मेडनसहित ६३ रन खर्चेर २ विकेट लिए । मार्क आदिर र क्रेग योंगले समान २ विकेट लिदा कर्टिस क्याम्फर, ग्यारेथ डेलानी र एन्डी म्याकबर्नीले समान एक विकेट लिए ।
