काठमाडौँ । जर्मनीका मिडफिल्डर इल्के गुन्डोगान अन्ततः स्पेनिस फुटबल क्लब बार्सिलोनामा अनुबन्धित भएका छन् । इंग्लिस क्लब म्यान्चेस्टर सिटीका कप्तान समेत रहेका ३२ बर्षिय गुन्डोगान फ्री–ट्रान्सफरमा बार्सिलोना गएका हुन् ।
बार्सिलोनाले गुन्डोगानलाई भित्र्याएको औपचारिक जानकारी दिएको छ । उनले बार्सिलोनासँग २०२५ सम्मका लागि सम्झौता गरेका छन् भने थप एक बर्ष नवीकरण गर्न सकिने शर्त राखिएको बार्सिलोनाले जानकारी दिएको छ ।
साथै बार्सिलोनाले उनको रिलिज क्लज ४०० मिलियन युरो राखेको छ । सिटीमा सात सिजन खेलेका गुन्डोगानले सिटीमा सम्झौता सकिएपछि नवीकरण गरेका थिएनन् ।
उनले सिटीका लागि ३०४ खेल खेल्दै ६० गोल गरेका छन् । त्यस्तै सिटीमा उनले कुल १४ ट्रफी जितेका छन् । जसमा यस सिजनको च्याम्पियन्स लिगको उपाधि समेत सामेल छ ।
