काठमाडौं । अब काठमाडौँ महानगरपालिका भित्र सवारी साधनलाई भाडामा लगाउने व्यक्ति वा संस्थाले बहाल कर तिर्नुपर्ने भएको छ ।
काठमाडौँ महानगरले आर्थिक ऐनमा बहाल कर असुल गर्ने क्षेत्र विस्तार गर्दै अब सवारी साधन थप गरेको हो । यसअघि जग्गा, भवन, घर, पसल, ग्यारेज, वर्कसप, गोदम, टहरा, सेड, जग्गा वा पोखरी पुरै वा आंशिक तवरले भाडामा लगाई प्राप्त बहाल रकममा बहाल कर लाग्ने प्रावधान थियो ।
यो सूचीमा आर्थिक वर्ष २०८०/८१ देखि महानगरले सवारी साधन करसमेत थपेको हो । सवार साधन कर स्रोतमै कट्टी हुने महानगरपालिकाले जनाएको छ । महानगरले क्रूल बहालमा वार्षिक १० प्रतिशतका दरले बहाल कर निर्धारण गरेको छ ।
यद्यपि वार्षिक बहाल रु एक लाखभन्दा कम हुने र आम्दानीको अन्य स्रोत नभएका करदाताको हकमा भने कर छुट माग्न सकिने र त्यसमा मूल्याङ्कन गरी ७५ प्रतिशतसम्म छुट दिने सकिने प्रावधान आर्थिक ऐनमा उल्लेख छ ।
