काठमाडौँ । आईसीसी क्रिकेट विश्वकप छनोट अन्तर्गत श्रीलंकाले आयरल्यान्डसामु ३२६ रनको लक्ष्य प्रस्तुत गरेको छ ।
आइतबार जिम्बावेस्थित क्विन्स स्पोर्ट्स क्लबमा भइरहेको खेलमा टस हारेपछि ब्याटिङमा आएको श्रीलंकाले निर्धारित ४९.५ ओभरमा अलआउट हुँदै ३२५ रनको योगफल जोडेको हो ।
श्रीलंकाका दिमुथ करुणारत्नेले शतकीय इनिङ्स खेले । उनले १०३ बलमा १०३ रन बनाए । यस्तै, सदिरा समराविक्रमाले ८२ रन जोडे । धनन्जय डी सिल्भाले अविजित ४२, चरिथा असलांकाले ३८ र पथुम निसांकाले २० रनको योगदान दिए ।
बलिङतर्फ आयरल्यान्डका मार्क अडायरले चार विकेट लिए । यस्तै बेरी म्याकार्थीले तीन विकेट लिँदा गारेथ डेलानीले दुई विकेट हात गिराए ।
समूह ‘बी’ मा रहेका दुवै टिमको यो तेस्रो खेल हो । समूहमा श्रीलंकाले यसअघिका दुवै खेलमा जित निकाल्दा आयरल्यान्ड भने जितविहीन छ ।
