काठमाडौँ । आइसिसी एकदिवसीय विश्वकप छनोट प्रतियोगिताअन्तर्गत समूह चरणको आफ्नो अन्तिम खेलमा नेपाल नेदरल्यान्ड्ससँग पराजित भएको छ ।
जिम्बावेको टाकासिँगा स्पोर्टस् क्लबमा भएको खेलमा नेपाल नेदरल्यान्ड्ससँग ७ विकेटले पराजित भएको हो । यो हारसँगै नेपालको विश्वकप सपनामा पुर्णविराम लागेको छ ।
यदि आज नेदरल्यान्ड्सलाई पराजित गरेको खण्डमा नेपाल सुपर सिक्स पुग्ने समीकरण बन्ने थियो । १६८ रनको लक्ष्य पछ्याएको नेदरल्यान्ड्सले २७.१ ओभरमा नै लक्ष्य भेट्टायो । नेपाललाई हराएको नेदरल्यान्ड्स सुपर सिक्समा पुगेको छ ।
नेदरल्यान्ड्सका लागि म्याक्स ओ‘ डोवडले सर्वाधिक ९० रन जोडे । ७५ बल खेलेका उनले ८ चौका र ४ छक्का प्रहार गरे । यस्तै, बास डी लिडेले ३९ बलमा ४१ रन जोडे । यस्तै विक्रमजीत सिंहले ४३ बलमा ३० रन जोडे । बलिङतर्फ नेपालका सन्दीप लामिछानेले २ तथा गुलशन झाले एक विकेट लिए ।
त्यसअघि जिम्बावेको टाकासिँगा स्पोर्टस् क्लबमा टस हारेर पहिले ब्याटिङको निम्तो पाएको नेपालले ४४ दशमलव ३ ओभरमा सबै विकेट गुमाउँदै एक सय ६७ रनको योगफल बनाएको थियो ।
नेपालका लागि कप्तान रोहित पौडेलले ५५ बलमा तीन चौका र एक छक्काको सहयोगमा सर्वाधिक ३३ रनको योगदान दिए । त्यस्तै नेपालका ओपनर आसिफ शेख तेस्रो ओभरको दोस्रो बलमा शून्य रनमा आउट भए । आजको खेलमा नेपालका कुनै ब्याटरका बीचमा उत्कृष्ट साझेदारी हुन सकेन ।
यसैगरी सन्दीप लामिछानेले ३३ बलमा चार चौकाको सहयोगमा २७ रन बनाए भने अर्का ओपनर कुशल भूर्तेलले ४२ बलमा दुई चौकाको सहयोगमा २७ रन जोडे । भीम सार्कीले ५६ बलमा एक चौकाको सहयोगमा २२ रन बनाए । दीपेन्द्रसिंह ऐरीले १४ र कुशल मल्लले १२ रन बनाए ।
नेदरल्यान्ड्सका लागि लगन भान विकले चार विकेट लिए भने बास डि लिड र विक्रमजित सिंहले समान दुई/दुई विकेट लिए । त्यस्तै क्लेटन प्लोयट र आर्यान दत्तले समान एक/एक विकेट लिए ।
