एजेन्सी । बलिउड अभिनेता सञ्जय दत्तले आगामी जिम्बावे अफ्रो टी १० लिगका लागि क्रिकेट टिम खरिद गरेका छन् । उनले हरारे हरिकेन्स टिम किनेका हुन् । सञ्जय भारतीय सेलिब्रेटी एरिज ग्रुप अफ कम्पनीका संस्थापक सोहन रोयसँगै टोलीको संयुक्त मालिक हुनेछन् । लिगमा सहभागी ६ टोलीमध्ये एउटा पाकिस्तानी फ्रेन्चाइजीले पनि किनेको थियो ।
लिगका लागि जिम्बावे क्रिकेटले अबु धाबी टी–१० लिग आयोजना गर्ने संस्था टी–१० ग्लोबल स्पोर्ट्ससँग सहकार्य गरेको छ । जिम्बावे एफ्रो टी १० लिग ९ दिने प्रतियोगिता हुनेछ । जिम्बावेमा पहिलो पटक लिग हुन लागेको हो । लिग जुलाई २० मा सुरु हुनेछ र फाइनल जुलाई २९ मा हरारे स्पोर्ट्स क्लबमा हुनेछ । प्रतियोगितामा कुल ५ टोलीको सहभागिता रहनेछ ।
सञ्जय दत्तको हरारे हरिकेन्स बाहेक, डरबन कलन्दर्स, केप टाउन साम्प आर्मी, बुलावायो ब्रेभ्स र जोबर्ग लायन्स जिम अफ्रो टी–१० लिगमा भाग लिने अन्य चार टोलीहरू हुनेछन् । खेलाडीको लिलामी जुलाई २ मा हरारेमा हुनेछ ।
टोली किनेर सञ्जय दत्तले भारतमा क्रिकेट धर्म जस्तै भएको बताए । ‘क्रिकेट खेल संसारको हरेक कुनामा फैलाउनु हाम्रो कर्तव्य हो ।’ उनले भने ।
