काठमाडौँ । साफ च्याम्पियनसिप फुटबल आज बुधबारबाट सुरु हुँदैछ । नेपालले आज उद्घाटन खेलमै बलियो प्रतिद्वन्द्वी कुवेतसँग प्रतिस्पर्धा गर्दैछ ।
नेपाल र कुवेतबीचको खेल नेपाली समयानुसार दिउँसो ३ः४५ बजे सुरु हुनेछ । खेल भारतको बैंगलोरस्थित श्री कान्तीरभा स्टेडियममा हुनेछ ।
नेपाली राष्ट्रिय फुटबल टोलीका मुख्य प्रशिक्षक भिन्सेन्जो अल्बर्टो एनिसले आफ्नो टोली १४औं साफ च्याम्पियनसिपमा बलिया टोलीहरुविरुद्ध भिड्न तयार रहेको बताएका थिए ।
साफ च्याम्पियनसिपको पूर्वसन्ध्यामा मंगलबार आयोजित पत्रकार सम्मेलनमा बोल्दै इटालियन प्रशिक्षक भिन्सेन्जोले साफका अन्य प्रशिक्षकहरुको तुलनामा आफू त्यति अनुभवी नभएपनि नेपाली खेलाडीहरु विपक्षी विरुद्ध उत्कृष्ट खेल पस्किन तयार रहेको प्रस्ट पारेका हुन् ।
समूह ए मा रहेको नेपालले २४ जुन आयोजक तथा डिफेन्डिङ च्याम्पियन भारत र २७ जुनमा पाकिस्तानसँग खेल्नेछ ।
नेपालको समूहमा भारत, कुवेत र पाकिस्तान रहेका छन् । त्यस्तै समूह ‘बी’मा लेवनान, बंगलादेश, माल्दिभ्स र भुटान रहेका छन् । प्रत्येक समूहको शिर्ष दुई टोली सेमिफाइनलमा प्रवेश गर्नेछन् । फाइनल खेल ४ जुलाईमा हुनेछ ।
