पोखरा । जबरजस्ती करणी, अपहरण तथा शरीर बन्धकको आरोपमा पक्राउ परेका बाग्लुङका प्रभात बस्याल धरौटीमा रिहा हुने भएका छन् । प्रभातलाई जिल्ला अदालत कास्कीले आइतबार १ लाख धरौटीमा रिहा गर्न अनुमति दिएको हो ।
न्यायाधीश केशवप्रसाद बास्तोलाको इजलासले प्रभातलाई धरौटीमा छोड्न आदेश दिएको हो। यसअघि जिल्ला अदालत म्याग्दीले प्रभातलाई साढे २ लाख धरौटीमा रिहा गर्न अनुमति दिएको थियो ।
उनी जिल्ला अदालत कास्कीमा १ लाख र म्याग्दी अदालतमा साढे २ लाख धरौटी बुझाएपछि रिहा हुनेछन् ।
गत जेठ ७ गते म्याग्दीकी २२ वर्षीया युवतीले प्रभातविरुद्ध जबरजस्ती करणी, अपहरण तथा शरीर बन्धनको आरोप लगाउँदै मुद्दा दर्ता गराएकी थिइन् ।
