विराटनगर । सोमबार कोशी प्रदेश सरकार र प्रदेश नामकरणको विपक्षमा आन्दोलनरत पहिचानवादी पक्षबीच वार्ता भएको छ । सोमबार विराटनगरको होटल विगमा करिब ५ घण्टा वार्ता भएको हो ।
वार्तापछि दुवै पक्षले छलफल सौहार्दपूर्ण भएको र फेरि वार्तामार्फत नै अघि बढ्ने बताएका छन् । दुवै पक्षको सल्लाहमा वार्ताको अर्को मिति तोक्ने सहमति भएको पनि उनीहरुले बताएका छन् ।
वार्तामा विषय प्रवेश भएको र पुन: वार्तामा बस्ने सहमति भएको सरकारी वार्ता टोलीका संयोजक मन्त्री तिलकुमार मेन्याङ्बोले बताउनुभयो । त्यस्तै आन्दोलनरत पक्षका वार्ता टोली सदस्य रामभक्त कुरुङ्वाले वार्तामा विषय प्रवेश भएको भन्दै फेरि वार्तामा बस्ने सहमति भएको जानकारी दिनुभयो ।
प्रदेशसभाले १७ फागुनमा प्रदेशको नाम कोशी राखेको थियो । तर पहिचान पक्षधर विभिन्न राजनीतिक दल र संघसंस्थाहरुले प्रदेश नामकरणको विरोधमा आन्दोलन सुरु गरेका थिए ।
