बुटवल । कोरोना संक्रमणबाट युनिभर्सल मेडिकल कलेज शिक्षण अस्पतालमा कार्यरत एक चिकित्सकको मृत्यु भएको छ । कपिलवस्तुका ३५ वर्षका फिजिसियन डा. पशुपति रजौरियाको उपचारको क्रममा ग्राण्डी इन्टरनेसनल हस्पिटल काठमाडौंमा बुधबार राति मृत्यु भएको हो ।
कोरोना संक्रमणपछि वैशाख २० गते युनिभर्सल मेडिकल कलेजमै एचडीयू कक्षमा उपचार गरेका रजौरियालाई ४ दिनपछि हेलिकप्टरमार्फत काठमाडौं ल्याइएको थियो ।
हालसम्म मेडिकल कलेजमा १ सय ६० जना स्वास्थ्यकर्मी कोभिड संक्रमित भएपनि चिकित्सक मृत्यु भएको यो पहिलो घटना भएको युनिभर्सल मेडिकल कलेजका सूचना अधिकारी सुशील गुरुङले बताउनुभयो ।
