एजेन्सी । एउटा ह्वेलले यमनका केही माझीहरुको जीवन फेरिदिएको छ । माझीहरुको एउटा समूहले एडनको खाडीमा एउटा मृत स्पर्म ह्वेल फेला पार्यो ।
ह्वेलको शरीरमा १५ लाख डलरभन्दा बढी मूल्य पर्ने एम्बर्गिस भनिने बहुमूल्य दुर्लभ पदार्थ भेटियो जुन अत्तर बनाउन प्रयोग हुन्छ ।
लामो गृहयुद्धका कारण यमनमा धेरै मानि प्रभावित भएका छन् । संयुक्त राष्ट्रसंघका अनुसार त्यहाँ ८० प्रतिशत मानिस भोकमरीको जोखिममा छन् । एम्बर्गिस भेटेकाले ती माझीको जीवनमा कायापलट भयो । पहिलेपहिले एम्बिर्गिस औषधि, धुप र योनशक्तिवर्धक ओषधिमा प्रयोग हुन्थ्यो ।
यो स्पर्म ह्वेलको पेटमा पाइने च्यापच्यापे मैनजस्तो पदार्थ हो । अनि हिजोआज यो अत्तरको सुगन्ध जोगाउन प्रयोग हुन्छ । ती माझीहरुले पैसा बाँडेको र अरुलाई सहयोग गरेको बताएका छन् । "हामीले घर किन्यौं, गरिबहरुलाई घर किन्न पैसा दियौं । मानिसहरुले राम्रो घर किने, गाडी र नाउ किने ।" एक माझीले बताए ।
विज्ञहरुका अनुसार १ देखि ५ प्रतिशत स्पर्म ह्वेलमा मात्र एम्बर्गिस हुन्छ । तिनलाई जोखिममा परेको ठानिन्छ । अनि केही देशहरुमा एम्बर्गिको बेचबिखनमा प्रतिबन्ध छ । तर धेरैलाई यो खेर जाने पदार्थ भएकाले प्रयोग गर्नुपर्छ भन्ने लाग्छ ।
ती माझीहरु अझै माछा मार्दै आएका छन् । "यो अविश्वसनीय सपनाजस्तो भयो । मैले समुद्रमा गइराख्नपर्छ केही नभेटिए पनि । यो मेरो रगतमा नै छ ।" एक माझीले भने । बीबीसी
