नयाँ दिल्लीः भारतमा कोरोनाभाइरस संक्रमणबाट मृत्यु हुनेको संख्यामा खासै कमी आएको छैन । पछिल्लो २४ घण्टामा फेरि तीन हजार ३८० जनाको कोभिड संक्रमणबाटै मृत्यु भएको छ ।
यो सहित भारतमा कोरोनाभाइरसको संक्रमणबाट मृत्यु हुनेको संख्या तीन लाख ४४ हजारको पुगेको केन्द्रीय स्वास्थ्य तथा जनसंख्या मन्त्रालयले जनाएको छ ।
तर कोरोना संक्रमितको संख्यामा भने सुधार आएको छ । पछिल्लो २४ घण्टामा एक लाख २० हजार व्यक्ति संक्रमित भएको देखिएको छ । जबकी एक लाख ९७ हजार व्यक्ति संक्रमणमुक्त भएका छन् ।
भारतमा हालसम्म कूल दुई करोड ८७ लाख व्यक्ति संक्रमित भएकामा दुई करोड ६७ लाख व्यक्ति संक्रमणमुक्त भएका छन् । भारतमा अझै पनि १५ लाख ५५ हजार व्यक्ति सक्रिय संक्रमित अवस्थामा रहेको मन्त्रालयको भनाई छ ।
गत जनवरीदेखि खोप दिन थालेको भारतमा हालसम्म २२ करोड ७८ लाख डोज खोप दिइएको छ ।
यसैबीच, भारतीय चिकित्सक संघको उत्तराखण्ड शाखाले पतञ्जलीले निर्माण गरेको कोरोनिललाई राज्यको कोभिड–१९ उपचार किटमा समावेश नगर्न अनुरोध गरेको छ । संघले कोरोनिललाई भारत सरकार र विश्व स्वास्थ्य संगठनले कोभिड उपचारमा प्रयोग गर्न प्रतिबन्ध लगाएको भन्दै उत्तराखण्ड राज्य सरकारसँग यस बारेमा गम्भीरतापूर्वक विचार गर्न आग्रह गरेको छ ।
कोरोनिललाई कोभिड उपचार किटमा समावेश गर्न आग्रह गर्दै उत्तराखण्ड राज्य सरकार समक्ष पतञ्जलीले निवेदन दिएपछि संघले यस्तो प्रतिक्रिया जनाएको हो ।
––
