एजेन्सी । आईपीएल २०२२ को फाइनल खेल चेन्नई सुपर किंग्स र गुजरात टाइटन्स बिच हुँदैछ । चेन्नईका कप्तान महेन्द्र सिंह धोनीको यो अन्तिम खेल पनि हुनसक्छ । ४१ वर्षीय धोनीले आफ्नो आईपीएल करियरको पाँचौं उपाधि जितेर सन्यास लिन सक्नेछन् ।
धोनीका फ्यानहरूले सिजनको सुरुदेखि नै यो कुरा बुझेका थिए र धोनीले यो सिजन जुनसुकै मैदानमा खेले, उनका फ्यानहरू उनलाई बिदाइ गर्न त्यही मैदानमा आएका थिए । कोलकातामा खेलेपछि फ्यानहरू उनलाई बिदाइ गर्न आएपछि धोनी आफैले पनि यो महसुस गरे ।
यस सिजनको आईपीएलको पहिलो खेल चेन्नई र गुजरातबीच अहमदाबादमा भएको थियो । यस खेलमा चेन्नईको जर्सीमा थुप्रै फ्यान आएका थिए भने गुजरातको घरेलु मैदानमा पनि चेन्नईलाई धेरै समर्थन मिलेको थियो । गायक अरिजित सिंहले समेत धोनीको खुट्टा छोए । दोस्रो खेलमा चेन्नईको टोलीले आफ्नो घरेलु मैदानमा खेलेको थियो र ठूलो संख्यामा फ्यानहरू उनीहरूलाई समर्थन गर्न आएका थिए । चेपौक मैदानमा भएको हरेक खेलमा चेन्नईले समर्थन पाउने पक्का थियो तर विपक्षी टोलीको घरेलु मैदानमा पनि चेन्नईले एकतर्फी समर्थन पाएको थियो ।
धोनी कोलकातादेखि जयपुरसम्म जहाँ पनि खेले, उनका फ्यानहरू उनलाई बिदाइ गर्न आएका थिए । यही कारणले गर्दा धोनीले कोलकातामा भावुक बने र आफ्नो करियरका पुराना दिनहरु सम्झिए । आफ्नो करियरको सुरुवातमा धोनी खड़गपुर रेलवे स्टेशनमा काम गर्थे र कोलकाताको मैदानमा मात्र खेल्न आउँथे । धेरै विपक्षी टोलीका कप्तानले पनि यो तथ्यलाई स्वीकार गरे ।
जयपुरको पूरै स्टेडियममा चेन्नईका फ्यानहरू देखेर राजस्थान रोयल्सका कप्तान सञ्जु सामसनले पनि भनेका थिए कि प्रायः यी फ्यानहरूले राजस्थानलाई सपोर्ट गर्छन् तर धोनीका कारण सबैजना चेन्नईको जर्सीमा स्टेडियम पुगेका हुन् ।
मुम्बई इन्डियन्सका ब्याटिङ कोच किरोन पोलार्डले पनि जब सचिन आफ्नो करियरको अन्त्यमा थिए, त्यसबेला मुम्बई टोलीले पनि धेरै समर्थन पाएको बताउँछन् । पोलार्ड त्यो टोलीका सदस्य थिए । उनले प्रत्येक मैदानमा धोनीलाई बिदाइ गर्न फ्यान आउने गरेको पनि बताए ।
धोनी अहिले आइपीएलमा मात्रै खेलिरहेका भए पनि उनले भारतीय टोलीका लागि चमत्कार गरेर फ्यानमाझ ठाउँ बनाएका छन् । आईपीएल सुरु हुनुअघि नै धोनी सुपरस्टार र विश्वकप विजेता बनेका थिए । उनले एकदिवसीय विश्वकप जिते । उनले भारतीय टोलीलाई टेष्ट वरीयताको शीर्ष स्थानमा पुर्याए र च्याम्पियन्स ट्रफी पनि जिते । उनले कोरोनाको समयमा अन्तर्राष्ट्रिय क्रिकेटबाट सन्यासको घोषणा गरेका थिए ।
उनलाई मैदानमा फ्यानहरुले बिदाइ दिन सकेनन् । गत सिजन धोनीले आफ्नो अन्तिम खेल चेन्नईमा खेल्ने बताएका थिए । यही कारणले यो वर्ष उनलाई बिदाइ गर्न फ्यानहरु आएका थिए । तर, धोनीले सन्यास लिनेबारे अहिलेसम्म निर्णय गरेका छैनन् । उनले आईपीएल २०२४ को लिलामी अघि यसबारे निर्णय लिनेछन् ।
