काठमाडौं । शुक्रबार प्रतिनिधिसभाको बैठकमा पशुपतिको जलहरीबारे प्रश्न उठेपछि त्यस विषयमा सर्वदलीय बैठक बसिरहेको छ ।
सभामुखको कार्यकक्षमा बसेको बैठकमा सबै दलका प्रमुख सचेतक र ठूला दलका सचेतकहरु सहभागी रहेका छन् ।
सत्तारुढ माओवादी केन्द्रका सांसद लेखनाथ दाहालले पशुपतिनाथमा पित्तलको जलहरी चढाएर एमाले अध्यक्ष केपी ओलीले भ्रष्टाचार गरेको आरोप लगाएपछि एमाले सांसदहरुले सरकारबिरुद्ध नाराबाजी गर्दै वेल घेराउ गरेका थिए ।
उक्त आरोप सत्यताका आधारित नभएको भनी एमालेले विरोध जनाएको छ । सरकारलाई त्यसको जवाफ दिन माग गर्दै एमालेका सांसदहरुले संसद चल्न नदिने अडान लिएका थिए । एमालेले प्रतिनिधिसभाको बैठक नै अवरुद्ध गरेपछि समाधानको उपाय खोज्न सर्वदलीय बैठक बसेको हो ।
