• १५ चैत्र २०८०, बिहीबार
  •      Thu Mar 28 2024
  •   Unicode
Logo
Latest
★   स्वास्थ्य क्षेत्रको सुधार गर्न भन्दै रास्वपाले स्वास्थ्यमन्त्री यादवलाई बुझायो २६ बुँदे सुझाव ★   महिलामैत्री बजेट ल्याउन सम्बन्धित मन्त्रालयसँग छलफल जारी छ: मन्त्री चौधरी ★   कोभिड निगरानीका लागि विश्व स्वास्थ्य संगठनद्वारा विश्वव्यापी सञ्जाल सुरु ★   वीरगञ्ज भन्सारद्वारा आठ महिनामा एक अर्ब राजस्व सङ्कलन ★   सौराहाको रोजगारी र आयको मुख्य स्रोत पर्यापर्यटन ★   पहिलो दिनको एसइई परीक्षा शान्तिपूर्ण रूपमा सम्पन्न ★   नयाँ दिल्लीको म्याक्स अस्पतालमा आरजु देउवाको शल्यक्रिया ★   टरवाइनको परीक्षण अन्तिम चरणमा ★   विश्वकपको यात्रा गर्नु खुशीको क्षण: प्रशिक्षक मोन्टी देसाई ★   २०८१ माघ ११ मा चलचित्र ‘अञ्जिला’ रिलिज हुने

फाइनलमा चेन्नईसँग भेट पक्का गर्न मुम्बई र गुजरात भिड्दै



एजेन्सी । इन्डियन प्रिमियर लिग (आईपीएल) अन्तर्गत आज शुक्रबार मुम्बई इन्डियन्स र गुजरात टाइटन्सबीच क्वालिफायर–२ खेल हुँदैछ । खेल अहमदाबादको नरेन्द्र मोदी स्टेडियममा साँझ ७ः४५ बजे सुरु हुनेछ ।

विजेता टोलीले आइतबार महेन्द्र सिंह धोनीको कप्तानीमा रहेको चेन्नई सुपर किंग्ससँग फाइनल खेल्नेछ भने हार्ने टोलीको यात्रा यहीँ समाप्त हुनेछ । प्लेअफमा दुवै टोली पहिलो पटक आमनेसामने हुँदैछन् ।

मुम्बई इन्डियन्स लिग चरणपछि अंक तालिकामा चौथो स्थानमा रह्यो । टोलीले १४ खेलबाट ८ जित र ६ हारसहित १६ अंक जोडेको थियो । रोहित शर्माको कप्तानीमा रहेको टोलीले एलिमिनेटरमा लखनउ सुपरजायन्ट्सलाई ८१ रनले पराजित गर्दै क्वालिफायर २ मा प्रवेश गरेको हो । मुम्बई १०औं पटक प्लेअफमा पुगेको छ । साथै उसले प्रतियोगिताको शीर्ष ४ चरणमा अहिलेसम्म १९ खेल खेलेको छ । जसमा मुम्बईले १३ मा जित र ६ मा मात्र हार बेहोरेको छ ।

गुजरातविरुद्धको टोलीका ४ विदेशी खेलाडी क्यामरुन ग्रीन, जेसन बेहरेनडर्फ, टिम डेभिड र क्रिस जोर्डन हुन सक्छन् । यसबाहेक ब्याटिङ पिच हेर्दा अलराउन्डर ऋतिक शोकिनको स्थानमा स्पिनर विशेषज्ञ कुमार कार्तिकेयलाई मौका मिल्न सक्छ ।

साविक विजेता गुजरात टाइटन्स लिग चरणको शीर्ष स्थानमा रहेको थियो । उसले १४ खेलमा १० जित र ४ हारबाट २० अंक बनाएको थियो । तर, क्वालिफायर–१ मा टोलीले चेन्नई सुपर किंग्ससँग हार बेहोरेको थियो । जसका कारण गुजरातले फाइनलमा पुग्ने दोस्रो मौका पाएको हो । गुजरातले घरेलु मैदानको फाइदा उठाउन सक्छ । यहाँ उसले अहिलेसम्म ८ खेल खेलेको छ जसमध्ये ५ खेलमा जित निकालेको छ ।

मुम्बई विरुद्ध जीटीका ४ विदेशी खेलाडी राशिद खान, नूर अहमद, डेभिड मिलर, दासुन शानाका अथवा अल्जारी जोसेफ हुन सक्छन् । गुजरातले दर्शन नल्कांडेको स्थानमा शिवम मावी वा अभिनव मनोहरलाई मौका दिन सक्छ भने शनाकाको स्थानमा जोसेफलाई मौका दिन सक्छ ।

मुम्बई इन्डियन्सले आफ्नो १०औं प्लेअफमा चौथो पटक क्वालिफायर–२ खेल्दैछ । साथै मुम्बईले पछिल्लो तीन पटक क्वालिफायर–२ मा प्रवेश गरेको थियो । जसमा मुम्बईले २ जित र १ मा हार बेहोरेको थियो । यो हार सन् २०११ मा रोयल च्यालेन्जर्स बैंग्लोरसँग भएको थियो । २०१२ देखि टोलीले २ क्वालिफायर–२ खेल्यो र दुबै जित्यो । २०१३ मा मुम्बईले राजस्थान रोयल्स र २०१७ मा कोलकाता नाइट राइडर्सलाई हराएको थियो ।

अर्कोतर्फ, गत वर्ष आईपीएलमा सामेल भएपछि गुजरातले पहिलो पटक क्वालिफायर–२ खेल्नेछ । गत सिजन टोलीले क्वालिफायर–१ र फाइनल जितेर ट्रफी उचालेको थियो ।

यी दुई टोली पहिलो पटक प्लेअफमा आमनेसामने हुनेछन्, तर प्रतियोगिताको लिग चरणमा यी दुई टोली अहिलेसम्म तीन पटक भिडेका छन् । जसमा मुम्बईले दुई पटक जितेको छ भने गुजरातले एक पटक जितेको छ । यस सिजनमा दुवैले २ खेल खेलेका थिए जसमा दुवै टोलीले एक–एक खेल जितेका थिए । अहमदाबादमा भएको खेल भने गुजरातले जितेको थियो ।

अहमदाबादको पिच हाई स्कोरिङ भएकोले यहाँ टस जितेर टिमहरू पहिले बलिङ गर्न चाहन्छन् । स्पिनरभन्दा पेसरले धेरै विकेट लिन्छन् । शुक्रबार मौसम न्यानो रहनेछ । पानी पर्ने सम्भावना छैन । राति ९ बजेपछि शीत पर्न सक्ने सम्भावना रहेको अवस्थामा टोलीलाई ब्याटिङमा सहजता आउन सक्छ ।

दुबै टिमका सम्भावित सुरुवाती–११
गुजरात टाइटन्सः हार्दिक पाण्ड्या (कप्तान) शुभमन गिल, ऋद्धिमान साहा (विकेटकीपर), विजय शंकर, दासुन शनाकारअभिनव मनोहर, डेभिड मिलर, राहुल तेवाटिया, राशिद खान, मोहम्मद शमी, यश दयाल र नूर अहमद ।

इम्प्याक्ट प्लेयर्सः दर्शन नल्कांडे, साई सुदर्शन, शिवम मावी, अल्जारी जोसेफ र साई किशोर ।

मुम्बई इन्डियन्सः रोहित शर्मा (कप्तान), इशान किशन (विकेटकिपर), क्यामरन ग्रीन, सूर्यकुमार यादव, तिलक वर्मा, नेहल वढेरा, टिम डेभिड, क्रिस जोर्डन, पियुष चावला, कुमार कार्तिकेय र आकाश मधवाल ।

इम्प्याक्ट प्लेयर्सः कुमार कार्तिकेय, अरशद खान, विष्णु विनोद, ट्रिस्टन स्टब्स र रिले मेरिडिथ ।